ក្រសួងស្ថាប័នពាក់ព័ន្ធរបស់កម្ពុជា សហការជាមួយ កម្មវិធីអភិវឌ្ឍន៍អង្គការសហប្រជាជាតិ (UNDP) នៅព្រឹកថ្ងៃទី៧ ខែមីនានេះ បានសម្ពោធជាផ្លូវការនៃរបាយការណ៍អភិវឌ្ឍន៍មនុស្សក្នុងតំបន់ឆ្នាំ២០២៤ ក្រោមប្រធានបទស្ថាបនាអនាគតយើង៖ទិសដៅថ្មីសម្រាប់ការអភិវឌ្ឍមនុស្សក្នុងតំបន់អាស៊ី និងប៉ាស៊ីហ្វិក ដែលប្រព្រឹត្តទៅក្រោមអធិបតីភាពរបស់ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី។
ក្នុងឱកាសនោះលោកស្រី Alissar Chakar អ្នកតំណាង UNDP ប្រចាំកម្ពុជា បានមានប្រសាសន៍ថា របាយការណ៍នេះ គឺបានពិនិត្យពីរបៀបដែលតំបន់អាស៊ីអាចបន្តងើបឡើងវិញ ហើយថែមទាំងកំណត់ឡើងវិញនូវការអភិវឌ្ឍន៍មនុស្ស ខណៈពេលដែលប្រទេសក្នុងតំបន់អាស៊ីក៏កំពុងឆ្លងកាត់ភាពស្មុគស្មាញ និងភាពមិនច្បាស់លាស់ ក្នុងការដឹកនាំផងដែរ។
លោកស្រី បានលើកឡើងថា នៅកម្ពុជា ការរាតត្បាតនៃជំងឺកូវីដ-១៩ បានធ្វើឱ្យធ្លាក់ចុះនៃសមិទ្ធផលអភិវឌ្ឍន៍ដែលរកបានដោយលំបាក។ ប៉ុន្តែកម្ពុជានៅតែពង្រីកការអភិវឌ្ឍប្រទេសរហូតអាចសម្រេចបាននូវកំណើនពិតប្រាកដរហូតដល់ ៥,២% នៅឆ្នាំ២០២២ និង ៥,៣% នៅឆ្នាំ២០២៣កន្លងទៅនេះ។
លោកស្រី បន្តទៀតថា ប្រទេសកម្ពុជាបានធ្វើឱ្យមានការកែលម្អគួរឲ្យសរសើរនៅចន្លោះឆ្នាំ១៩៩០ និងឆ្នាំ២០២១ ជាមួយនឹងប្រាក់ចំណូលសម្រាប់មនុស្សម្នាក់កើនឡើងបួនដងដល់ជាង ៤ពាន់ដុល្លារអាមេរិក។
ក្នុងឱកាសនោះដែរ ឯកឧត្តម វង្សី វិស្សុត មានប្រសាសន៍ថា ការអភិវឌ្ឍមនុស្ស គឺជាការផ្តោតលើការពង្រីកឱកាសសេរីភាព និងជម្រើសរបស់ពួកគេ ព្រមទាំងធ្វើឲ្យប្រសើរឡើងនូវសុខុមាលភាពរបស់មនុស្សផងដែរ។ ឯកឧត្តមបន្ថែមថា មនុស្ស និងសហគមន៍មិនគួរជាអ្នកដែលទទួលភាពអសកម្មពីការអភិវឌ្ឍនោះទេ ប៉ុន្តែជាភ្នាក់ងារសកម្មដែលអាចចូលរួមយ៉ាងពេញលេញនៅក្នុងជីវិតសេដ្ឋកិច្ច សង្គម នយោបាយ និងនៅក្នុងការកសាងសន្តិសុខ។
សូមជម្រាបជូនថា នៅក្នុងកម្មវិធីនេះដែរ ក៏មានរៀបចំធ្វើបទបង្ហាញដើម្បីស្វែងយល់អំពីប្រទេសកម្ពុជាយ៉ាងស៊ីជម្រៅ និងឆ្លុះបញ្ចាំងពីការយល់ដឹង និងផលប៉ះពាល់នៃរបាយការណ៍អភិវឌ្ឍន៍មនុស្សក្នុងតំបន់ឆ្នាំ២០២៤ សម្រាប់របាយការណ៍អាស៊ី និងប៉ាស៊ីហ្វិកលើការពង្រឹងការអភិវឌ្ឍន៍មនុស្សក្នុងបរិបទនៃការអនុវត្តយុទ្ធសាស្ត្រមន្ទីរបញ្ចកោណផងដែរ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
