បណ្តាក្រុមយុវជន យុវនារី ដែលស្ថិតក្នុងបន្ទុកគ្រួសារក្រីក្រ និងងាយរងហានិភ័យគិតត្រឹមថ្ងៃទី៧ ខែ​មីនានេះ ពួកគេទទួលបានប្រាក់ឧបត្ថម្ភប្រចាំខែដំបូងរួចហើយ ក្រោយ​ពីពួក​គេ​បាន​ខិតខំ​រៀន​ជំនាញ​វិជ្ជាជីវៈ ក្នុងកម្មវិធីគោល​នយោបាយ​បណ្តុះបណ្តាល​ជំនាញ​វិជ្ជាជីវៈ​យុវជន​ចំនួន​ ១លាន ៥សែន​​នាក់របស់រាជរដ្ឋាភិបាល។

បណ្តាក្រុមយុវជនមកពីគ្រួសារក្រីក្រ និងងាយរងហានិភ័យ ដែលកំពុងរៀនជំនាញវិជ្ជាជីវៈ TVET នៅ​វិទ្យាស្ថានពហុបច្ចេកវិទ្យាតេជោ សែន ក្រុងតាខ្មៅ ខេត្តកណ្តាល បានថ្លែងថា មកដល់ពេល​នេះពួក​គេ​ទាំងអស់គ្នាដែលបានចូលរៀនជំនាញវិជ្ជាជីវៈ និងមានបណ្ណសមធម៌ ឬបណ្ណក្រីក្រ និង​បណ្ណ​ងាយ​រងហានិភ័យជាដើម គឺបានបើកប្រាក់ខែ ២៨ម៉ឺនរៀល​នៅ​ក្នុង​ខែ​ដំបូង​រួច​រាល់​អស់​ហើយ ពីរាជរដ្ឋាភិបាល ក្រោយពួកគេទាំងអស់បានចូលរៀនជំនាញវិជ្ជាជីវៈរយៈពេល១ខែ។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម កត្តា អន ថ្លែងថា នៅក្នុ​ង​ខែ​ដំបូង នៃការអនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ជូនយុវជនចំនួន១លាន ៥សែននាក់ របស់រាជរដ្ឋាភិបាល មានយុវជនយុវនារីមកពីគ្រួសារក្រីក្រ និងគ្រួសារ​ងាយ​រង​ហានិភ័យ​ចំនួនជាង ៥៣០០នាក់ គឺបានផ្តល់ប្រាក់​ឧបត្ថម្ភ​ប្រចាំ​ខែ​ចំនួន ២៨​ម៉ឺនរៀល​ពី​រាជរដ្ឋាភិបាល ហើយប្រាក់ឧបត្ថម្ភនេះបានដាក់បញ្ចូលទៅក្នុងប្រព័ន្ធគណនីវីង របស់យុវជន យុវនា​រី​ផ្ទាល់សម្រាប់ម្នាក់ៗរួចអស់ហើយ។

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ធ្លាប់បានលើកឡើងថា ការ​អនុវត្តកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសជូនយុវជន១លាន៥នាក់ គឺសាលា TVET ទទួលគ្រប់​យុវជន​ចូល​រៀន​មាន​កម្រិត​ចំណេះ​ដឹង​ចាប់​ពី​ថ្នាក់​ទី៩ ឡើង​ទៅ​ដោយ​មិន​មាន​ការបង់ថ្លៃសិក្សា ពោលយុវជនដែល​ចូល​សិក្សា​ជំនាញ​នេះ​គឺ​ចំណេញ​ថវិកា​បង់ថ្លៃ​សាលា​ប្រមាណ​ជាង ៤០០ ដុល្លារ។ ដោយឡែកយុវជនមកពីគ្រួសារក្រីក្រ និងងាយរងហានិភ័យ​គឺ​រាជ​រដ្ឋាភិបាល​ឧបត្ថម្ភ​បន្ថែមចំនួន២៨ម៉ឺនរៀល និងផ្តល់កន្លែងស្នាក់នៅផងដែរ៕ អត្ថបទ៖ ស៊ុម សុខជា