ភ្នំពេញ ៖ អនុវត្តតាមវិធានការដ៏ម៉ឺងម៉ាត់ និងមុតស្រួចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការប្រយុទ្ធប្រឆាំងគ្រឿងញៀននៅតាមក្រសួង ស្ថាប័ន និងរដ្ឋបាលថ្នាក់​ក្រោម​ជាតិ ពោលគឺបើរកឃើញមានមន្ត្រីរូបណាមាន​សារធាតុញៀនក្នុងខ្លួននឹងត្រូវបណ្តេញចេញ​ពី​ក្រប​ខណ្ឌ​ដោយគ្មានការលើកលែងនោះ នៅព្រឹកថ្ងៃទី០៧ ខែមីនា ឆ្នាំ២០២៤ ក្រោម​ការណែ​នាំពី​ឯកឧត្ដម ឃួង ស្រេង អភិបាលរាជធានីភ្នំពេញ ថ្នាក់ដឹកនាំ និងមន្ត្រីរាជការទាំងអស់​ចំណុះឱ្យ​រដ្ឋបាល​រាជ​ធានីភ្នំពេញត្រូវបានធ្វើតេស្តស្វែងរកសារធាតុញៀនក្នុងខ្លួន។ ការធ្វើតេស្តស្វែងរកសារធាតុញៀននេះបានធ្វើឡើងនៅក្នុងបរិវេណសាលារាជធានីភ្នំពេញ ដោយ​ពិនិត្យទាំងក្នុងជួរគណៈអភិបាល នាយករងរដ្ឋបាល អនុប្រធានការិយាល័យប្រជាពលរដ្ឋ នាយិកា-​នាយិការងទីចាត់ការ-អង្គភាព ថ្នាក់ការិយាល័យ និងមន្ត្រីកិច្ចសន្យាផងដែរ។

សូមជម្រាបជូនថា មន្ត្រីបំរើការងារនៅសាលារាជធានីភ្នំពេញមានសរុបចំនួន ៥៤៧រូប ហើយ​ក្នុង​ចំនួន​នេះ ក្រោយការធ្វើតេស្ត គឺមិនមានមន្ត្រីណាម្នាក់មានសារធាតុញៀននៅក្នុងខ្លួនឡើយ ពោល​គឺ​ល្អ១០០%។

គួរំលឹកថា កាលពីថ្ងៃទី២០ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្រ្តី បាន​ដាក់​ចេញ​បទបញ្ជាជាវិធានការម៉ឺងម៉ាត់ក្នុងការប្រយុទ្ធ​ប្រឆាំង​គ្រឿងញៀន​ខុស​ច្បាប់​នៅ​តាម​ក្រសួង ស្ថាប័ន និងរដ្ឋបាលថ្នាក់ក្រោមជាតិ ដោយតម្រូវឱ្យគ្រប់ក្រសួង ស្ថាប័ន និងរដ្ឋបាល​ថ្នាក់​ក្រោម​ជាតិ ត្រូវបង្កើនការត្រួតពិនិត្យជាប្រចាំចំពោះមន្ត្រីរាជការស៊ីវិល មន្ត្រីនគរបាលជាតិ និ​ង​យោធិន ព្រមទាំងមន្ត្រីជាប់កិច្ចសន្យាដែលស្ថិតក្រោមឱវាទរបស់ខ្លួន លើការប្រើប្រាស់​គ្រឿង​ញៀន​ខុស​ច្បាប់ ឬមានការពាក់ព័ន្ធនឹងគ្រឿងញៀនខុសច្បាប់។ គ្រប់ក្រសួង ស្ថាប័ន និងរដ្ឋបាល​ថ្នាក់​ក្រោម​ជាតិ ត្រូវចាត់វិធានការបញ្ចប់មុខតំណែង និងបណ្តេញចេញ​ពី​ក្របខ័ណ្ឌ​ដោយ​គ្មាន​ការ​លើក​លែង ចំពោះមន្ត្រីរាជការស៊ីវិល មន្ត្រីនគរបាលជាតិ និងយោធិន ព្រមទាំងមន្ត្រី​ជាប់​កិច្ច​សន្យា​ណាដែ​ល​ត្រូវបានរកឃើញថា មានការប្រើប្រាស់គ្រឿងញៀនខុសច្បាប់ ឬមានការពាក់ព័ន្ធ​នឹង​គ្រឿង​ញៀន​ខុសច្បាប់។ ការអនុវត្តទណ្ឌកម្មខាងវិន័យនេះ ពុំរារាំងដល់ការអនុវត្ត​ទណ្ឌកម្ម​ព្រហ្ម​ទណ្ឌ​ដោយ​អនុលោមតាមច្បាប់ និងបទប្បញ្ញត្តិជាធរមានឡើយ៕ អត្ថបទ ៖ ប្រាក់ វ៉ាន់ដា