មនី្ទរពេទ្យមិត្តភាពខ្មែរ-សូវៀត បានប្រារព្ធពិធីអបអរសាទរខួបអនុស្សាវរីយ៍លើកទី១១៣ ទិវានារី​អន្តរជាតិ ៨មីនា ២០២៤ ក្រោមប្រធានបទ «ស្ត្រី និងក្មេងស្រីក្នុងបរិវត្តកម្មឌីជីថល Women and Girls in Digital Transformation» នាព្រឹកថ្ងៃទី៧ ខែមីនា ឆ្នាំ២០២៤នេះ។

បើតាមលោកស្រីវេជ្ជបណ្ឌិត ប៉ាន់ អាន ការិយាល័យបច្ចេកទេស នៃមនី្ទរពេទ្យមិត្តភាពខ្មែរ-សូវៀត បាន​ឲ្យដឹងថា ថ្ងៃ៨ មីនា ជាទិវាមួយ ដែលព្រះរាជាណាចក្រកម្ពុជា រៀបចំឡើងជារៀងរាល់ឆ្នាំ ដើម្បី​រំលឹកពីការតស៊ូទាមទារសិទ្ធិស្មើគ្នា សេរីភាព និងឆ្លុះបញ្ចាំងអំពីវឌ្ឍនភាព សមិទ្ធផល បញ្ហា​ប្រឈម ការប្តេជ្ញាចិត្ត និងវិធានការជាវិជ្ជមាននានា នៅក្នុងការលើកកម្ពស់សមភាពយេនឌ័រ និង​បង្កើន​ភាពអង់អាចដល់ស្ត្រី និងក្មេងស្រីគ្រប់រូប។ រាជរដ្ឋាភិបាលតែងតែបានផ្តោតការយកចិត្តទុកដាក់ជាពិសេសទៅលើ សុខភាពមាតា ទារក និង​កុមារ និងសមភាពយ៉េនឌ័រលើការងារស្រ្តីក្នុងការចូលរួមអភិវឌ្ឍន៍ សេដ្ឋកិច្ច និងសង្គម​ជាតិ​ដោយ​កំណត់ថា “ស្ត្រីជា ឆ្អឹងខ្នង នៃសេដ្ឋកិច្ច និងសង្គមជាតិ”។ ម្យ៉ាង​ទៀត​ក្នុង​ការអនុវត្តគោល​នយោបាយ​​សមភាពយ៉េនឌ័រ ថ្នាក់ដឹកនាំមន្ទីរពេទ្យមិត្តភាពខ្មែរ-សូវៀត ក៏បានយកចិត្ត​ទុក​ដាក់​យ៉ាង​ខ្លាំង​ចំពោះនារីនៅក្នុងមន្ទីរពេទ្យដោយបានផ្តល់អទិភាពដល់ស្ត្រី​ដែលមាន​សមត្ថភាព​ឲ្យ​បាន​ទទួល​នូវ​មុខតំណែងសមស្របក្នុងការងាររបស់ខ្លួន។ នារីយើងទាំងអស់គ្នា សូមប្ដេជ្ញាអស់ ពីកម្លាំង​​កាយចិត្ត ស្មារតី ឆន្ទៈ ពុះពារក្នុងការងារ​ចំពោះមុខប្រកបដោយភាពប្រឌិត​ឲ្យ​កាន់​តែ​ប្រសើរ​ឡើង ក្នុងការផ្តល់សេវាពិនិត្យ ព្យាបាល ថែទាំ បំរើប្រជាពលរដ្ឋ ដើម្បីរួមចំណែក​ស្តារ និង​អភិវឌ្ឍន៍​ប្រទេសជាតិ មាតុភូមិនៃយើង។ បច្ចុប្បន្នមានចំនួនបុគ្គលិកមន្ត្រីរាជការជានារីដែលបំរើ​ការងារនៅ​ក្នុង​មនី្ទរពេទ្យ មានចំនួន​សរុប ៦៨៣នាក់ ដែលនឹង៤៧%នៃចំនួនបុគ្គលិកសរុប។

នាឱកាស​នោះលោកសាស្រ្តាចារ្យ លឹម តាំង នាយករងមនី្ទរពេទ្យ តំណាងឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានថ្លែងថា នៅក្នុងប្រធានបទទិវានារីឆ្នាំនេះ ក្នុងគោលបំណងរំលេចអំពីសក្តានុពល និងភាពចាំបាច់នៃការលើកកម្ពស់ការចូលរួម និង​ភាព​ជា​តំណាងរបស់ស្ត្រី និងក្មេងស្រី នៅក្នុងវិស័យឌីជីថល ប្រកបដោយប្រសិទ្ធភាព និងសុវត្ថិភាព និង​បន្ត​រំលេច​ពីតម្លៃនៃសន្តិភាព និងការលើកកម្ពស់សមភាពយេនឌ័រ ដែលរាជរដ្ឋាភិបាល​បាន​នឹង​កំពុង​ជំរុញ​ឲ្យមានការចូលរួមពីគ្រប់ស្ថាប័ន រួមទាំងបុរស ទាំងស្រី្ត ដើម្បីវឌ្ឍនភាពសង្គម ឆ្ពោះ​ទៅ​លើកកម្ពស់សិទ្ធិ ស្ថានភាព ជីវភាព ឋានៈតួនាទីរបស់ស្រី្ត និងសុខុមាលភាពរបស់មាតា និងទារក ដើម្បី​អភិវឌ្ឍន៍ធនធានមនុស្សប្រកបដោយគុណភាព និងសមត្ថភាព ដែលជា​ផ្នែកមួយ នៃគោល​នយោបាយ​របស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិត និងភាពឈ្លាសវៃរបស់​សម្តេច​មហាបវរធិបតី ហ៊ុន ម៉ាណែត នៃព្រះរាជាណាចក្រកម្ពុជា។

សូមបញ្ជាក់ថា រាជរដ្ឋាភិបាលកម្ពុជាអាណត្តីទី៧ បានដាក់ចេញនូវយុទ្ធសាស្រ្តបញ្ចកោណ ដំណាក់​កាលទី១ ដែលរួមបញ្ចូលការងាររបស់ស្ត្រី ជាការចូលរួមចំណែកអភិវឌ្ឍសេដ្ឋកិច្ច និង​សង្គមជាតិ ហើយបានផ្តល់ឱកាស និងលើកទឹកចិត្តឱ្យស្រ្តីមានតួនាទី និង​មុខតំណែង​ជា​អ្នក​គ្រប់​គ្រង និងដឹកនាំចាប់តាំងពីថ្នាក់ក្រោមជាតិរហូតដល់ថ្នាក់ដឹកនាំកំពូល។ អត្ថបទ រដ្ឋា