រដ្ឋបាលរបស់លោកប្រធានាធិបតីអាមេរិក ចូ បៃដិន (Joe Biden) បានប្រឈមមុខនឹងការអំពាវនាវកាន់តែខ្លាំងឡើងពីសមាជិកបក្សប្រជាធិបតេយ្យរបស់ខ្លួនកាលពីថ្ងៃពុធ (០៦មីនា) ដើម្បីជំរុញអ៊ីស្រាអែល ឱ្យបន្ធូរបន្ថយវិបត្តិមនុស្សធម៌នៅហ្កាហ្សា ដោយអ្នកខ្លះនិយាយថា ពួកគេអាចនឹងព្យាយាមបញ្ឈប់ជំនួយយោធា ប្រសិនបើលក្ខខណ្ឌសម្រាប់ជនស៊ីវិលមិនប្រសើរឡើង។

ព្រឹទ្ធសមាជិក គ្រីស វ៉ាន់ហូលែន (Chris Van Hollen) របស់គណបក្សប្រជាធិបតេយ្យនៃគណៈកម្មាធិការទំនាក់ទំនងបរទេស និងសមាជិកសភាផ្សេងទៀតបានអំពាវនាវឱ្យរដ្ឋបាលលោក បៃដិន បញ្ឈប់ជំនួយផ្នែកយោធាដល់ប្រទេសអ៊ីស្រាអែល ប្រសិនបើរដ្ឋាភិបាលរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu) មិនចាត់វិធានការដូចជាការបើកច្រកឆ្លងកាត់ចូលទៅក្នុងហ្កាហ្សា សម្រាប់ការដឹកជញ្ជូនជំនួយ។

លោក វ៉ាន់ហូលែន បានបញ្ជាក់ថា ច្បាប់របស់សហរដ្ឋអាមេរិក ហាមឃាត់ការលក់អាវុធទៅឱ្យប្រទេសដែលរារាំងជំនួយមនុស្សធម៌ ហើយបាននិយាយថាលោក និងសមាជិកសភាផ្សេងទៀតអាចព្យាយាមទប់ស្កាត់ការលក់អាវុធថ្មីដល់អ៊ីស្រាអែល ប្រសិនបើរដ្ឋាភិបាលរបស់ខ្លួនមិនដោះស្រាយវិបត្តិនោះ។

ការវាយលុករបស់អ៊ីស្រាអែលនៅតំបន់ហ្កាហ្សា បានធ្វើឱ្យមនុស្សភាគច្រើននៃប្រជាជនចំនួនសរុប ២,៣ លាននាក់របស់តំបន់ហ៊ុមព័ទ្ធនេះផ្លាស់ទីលំនៅ និងនាំឱ្យមានកង្វះខាតស្បៀងអាហារ ទឹក និងថ្នាំពេទ្យជាដើម៕