ភ្នំពេញ ៖ ក្រសួងសង្គមកិច្ច អតីតយយុទ្ធជន និងយុវនីតិសម្បទា បានចូលរួមយ៉ាងខ្លាំងក្លាក្នុងការផ្ដល់ឱកាសជូនដល់ស្ត្រី។ ជាក់ស្ដែងគិតត្រឹមឆ្នាំ២០២៤នេះ ក្រសួងមានមន្ត្រីជាស្ត្រីជិត៨០០នាក់ កំពុងបំពេញការងារយ៉ាងសកម្មលើការងារសង្គមកិច្ចសម្រាប់សង្គមជាតិកម្ពុជា។ នេះបើតាមឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ថ្លែងក្នុងឱកាសប្រារព្ធពិធីសាទរ ទិវាអន្តរជាតិនារី៨មីនា នៅថ្ងៃទី៧ ខែមីនា ឆ្នាំ ២០២៤នេះ។

​ក្រសួងសង្គមកិច្ចនៅថ្ងៃនេះ បានរៀបចំពិធីជួបជុំជាមន្ត្រីដើម្បីអបអរសាទរ ទិវាអន្តរជាតិនារី ៨មីនា។ ក្នុងឱកាសរៀបចំពិធីនេះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានថ្លែងអំណរគុណដល់មន្ត្រីជាស្ត្រី ដែលបានចូលរួមបំពេញការងារយ៉ាងសកម្មកន្លងមក ក្នុងការងារសង្គមកិច្ចនៅកម្ពុជា។ 

ឯកឧត្តមលើកឡើងដែរថា ក្នុងពេលបច្ចុប្បន្ននេះ សម្រាប់ក្រសួងសង្គមកិច្ច ក៏មានវត្តមានមន្ត្រីរាជការជាស្ត្រី សរុប ៧៨៥នាក់ ក្នុងនោះមន្រ្តីក្របខ័ណ្ឌចំនួន ៤៦ ៨នាក់ និងមន្ត្រី ជាប់កិច្ចសន្យា ជាស្ត្រីចំនួន ៣១៧នាក់ កំពុងបម្រើការងារជូនក្រសួងផងដែរ។ ចំពោះតួនាទីរបស់មន្ត្រីជាស្ត្រី គឺមានចាប់ពីមន្ត្រី រហូតដល់រដ្ឋលេខាធិការ។

ជាការលើកទឹកចិត្តចំពោះសមិទ្ធផលការងារកន្លងមករបស់មន្ត្រីជាស្ត្រី ឯកឧត្តម រដ្ឋមន្ត្រី ក៏បានផ្ដល់ជាប័ណ្ណសសើរ និងកាដូជូនដល់មន្ត្រីជាស្ត្រី ក្នុងឱកាសអបអរសាទរទិវាអន្តរជាតិនារីផងដែរ។ ក្នុងពិធីដដែលនេះ មន្ត្រីជាស្ត្រីក៏បានលើកឡើងជាការមើលឃើញពីភាពប្រសើរនៃសមភាពយែនឌរ នៅកម្ពុជាផងដែរ។ ពួកគាត់មើលឃើញថា ស្ត្រីមានភាពខ្លាំង មានសមត្ថភាពដូចជាបុរស និងទទួលបានឱកាសបំពេញការងារជាថ្នាក់ដឹកនាំដូចជាបុរសផងដែរ។ 

មុននឹងបិទបញ្ចប់កម្មវិធីអបអរសាទរ ទិវាអន្តរជាតិនារី នេះ ឯកឧត្តមរដ្ឋមន្ត្រី ជា សុមេធី ក៏បានលើកឡើង

 សូមឱ្យនារីត្រូវចេះជួយខ្លួនឯង ជាពិសេស ការអភិវឌ្ឍន៍សមត្ថភាព និងស្វែង យល់ចំណេះដឹងផ្សេងៗបន្ថែមទៀត ដើម្បីឆ្លើយតបនឹងការវិវឌ្ឍរីកចម្រើនឥតឈប់ឈររបស់សង្គមជាតិ និងឆ្លើយតប ទៅនឹងប្រធានបទ «ស្ត្រី និងក្មេងស្រី ក្នុងបរិវត្តកម្មឌីជីថល‌»៕

អត្ថបទ៖ គឹមហុក