សហរដ្ឋអាមេរិក និងទួរគី គ្រោងនឹងចាប់ផ្តើមកិច្ចចរចាដ៏ទូលំទូលាយនៅថ្ងៃព្រហស្បតិ៍នេះ ដើម្បីពិភាក្សាថាតើសម្ព័ន្ធមិត្តណាតូ អាចចេញផុតពីការខ្វែងគំនិតគ្នាយ៉ាងស៊ីជម្រៅលើបញ្ហាមួយចំនួនដូចជា ស៊ីរី និងទំនាក់ទំនងជិតស្និទ្ធរបស់ទីក្រុងអង់ការ៉ាជាមួយរុស្ស៊ីដែរឬទេ។

មន្ត្រីជាន់ខ្ពស់អាមេរិក និងទួរគី គ្រោងនឹងជួបប្រជុំគ្នានៅក្រសួងការបរទេសសម្រាប់កិច្ចចរចាជាច្រើនលើក ដែលផ្តោតលើប្រធានបទស្តីពីស៊ីរី ការឈ្លានពានរបស់រុស្ស៊ីលើអ៊ុយក្រែន កិច្ចសហប្រតិបត្តិការលើវិស័យការពារជាតិ ថាមពល ការប្រឆាំងភេរវកម្ម និងសង្គ្រាមអ៊ីស្រាអែល-ហាម៉ាស។

ការសន្ទនាដែលគេហៅថា យន្តការយុទ្ធសាស្ត្រ នឹងកំណត់ដំណាក់កាលសម្រាប់ជំនួប នៅថ្ងៃសុក្ររវាងរដ្ឋមន្ត្រីការបរទេសអាមេរិកលោក អង់តូនី ប្ល៊ីនខិន (Antony Blinken) និងសមភាគីទួរគី លោក ហាកានហ្វីដាន (Hakan Fidan)។

ទំនាក់ទំនងរវាងសហរដ្ឋអាមេរិក និងទួរគី បានស្ថិតនៅឆ្ងាយពីភាពជាដៃគូយុទ្ធសាស្ត្រក្នុងប៉ុន្មានឆ្នាំចុងក្រោយនេះ ខណៈដែលការខ្វែងគំនិតគ្នារវាងសម្ព័ន្ធមិត្តសន្ធិសញ្ញាដែលអូសបន្លាយជាយូរមកហើយទាំងពីរ បានរីកកាន់តែធំឡើងនោះ។

ការទិញយកប្រព័ន្ធខែលការពារS-400របស់រុស្ស៊ីនៅឆ្នាំ២០១៩ដោយប្រទេសទួរគី បានបង្កឲ្យមានការដាក់ទណ្ឌកម្មរបស់សហរដ្ឋអាមេរិកលើទីក្រុងអង់ការ៉ា និងនាំទៅដល់ការដកខ្លួនចេញពីកម្មវិធីយន្តហោះចម្បាំងបំបាំងកាយF-35 ។ ទន្ទឹមនឹងនេះ ប្រទេសទួរគី នៅតែមានបញ្ហាយ៉ាងខ្លាំងចំពោះការគាំទ្ររបស់សហរដ្ឋអាមេរិកនៅភាគខាងជើងប្រទេសស៊ីរីចំពោះកងជីវពលឃើដ ដែលខ្លួនមើលឃើញថា ជាការពង្រីកនៃគណបក្សពលករឃើដ( PKK) ជាក្រុមសកម្មប្រយុទ្ធដែលខ្លួនចាត់ទុកថា ជាអង្គការភេរវកម្ម។