លោក Moussa Salaou Barmou ប្រមុខកងកម្លាំងប្រដាប់អាវុធរបស់ប្រទេសនីហ្សេ បាននិយាយកាលពីថ្ងៃពុធ បន្ទាប់ពីកិច្ចប្រជុំមួយជាមួយសមភាគីរបស់លោកថា ប្រទេសដឹកនាំរបបយោធា នីហ្សេ ប៊ួគីណាហ្វាសូ និងម៉ាលី បានយល់ព្រមបង្កើតកងកម្លាំងរួមគ្នាមួយ ដើម្បីដោះស្រាយការគំរាមកំហែងផ្នែកសន្តិសុខ នៅទូទាំងទឹកដីរបស់ពួកគេ។

ការសម្រេចចិត្តនេះ គឺជាសញ្ញាចុងក្រោយបំផុតនៃការចងសម្ព័ន្ធឲ្យកាន់តែជិតស្និទ្ធដែលនឹងកើតឡើង ចាប់តាំងពីប្រទេសជិតខាងទាំងបីនៅក្នុងតំបន់សាហែល (Sahe)ភាគកណ្តាល ដែលហែកហួរដោយបះបោរនៅអាហ្វ្រិកខាងលិច បានផ្តាច់ទំនាក់ទំនងយោធាជាមួយសម្ព័ន្ធមិត្តយូរអង្វែងរួមទាំងប្រទេសបារាំង និងបានបង្កើតកតិកាសញ្ញាសហប្រតិបត្តិការ ដែលត្រូវបានគេស្គាល់ថា ជាសម្ព័ន្ធភាពនៃរដ្ឋហែល(AES)។

នៅក្នុងសេចក្តីថ្លែងការណ៍តាមទូរទស្សន៍ លោក Barmou បាននិយាយថា ក្រុមការងារថ្មី«នឹង ប្រតិបត្តិការឲ្យបានឆាប់តាមដែលអាចធ្វើទៅបាន ដើម្បីឆ្លើយតបទៅនឹងបញ្ហាប្រឈមផ្នែកសន្តិសុខ» ប៉ុន្តែមិនបានផ្តល់ព័ត៌មានលម្អិតបន្ថែមអំពីទំហំ ឬបញ្ជូនកម្លាំងនោះទេ។

អំពើហិង្សាក្នុងតំបន់ជំរុញដោយការប្រយុទ្ធរយៈពេលមួយទសវត្សរ៍ជាមួយក្រុមអ៊ីស្លាម ដែលមានទំនាក់ទំនងជាមួយក្រុមអាល់កៃដា និងក្រុមរដ្ឋអ៊ីស្លាម បានកាន់តែអាក្រក់ឡើង ចាប់តាំងពីយោធារបស់ប្រទេសទាំងបី បានដណ្តើមអំណាចក្នុងរដ្ឋប្រហារបន្តបន្ទាប់ពីឆ្នាំ ២០២០ ដល់ឆ្នាំ ២០២៣។

អំពើហិង្សានេះ បានឈានដល់កម្រិតខ្ពស់នៅឆ្នាំ ២០២៣ ដោយចំនួនអ្នកស្លាប់ដោយសារជម្លោះនៅតំបន់សាហែលភាគកណ្តាល កើនឡើងដល់៣៨ភាគរយ បើធៀបនឹងឆ្នាំមុន នេះបើយោងតាមក្រុមឃ្លាំមើលវិបត្តិដែលមានមូលដ្ឋាននៅសហរដ្ឋអាមេរិក (ACLED) ដោយលើកឡើងពីរបាយការណ៍ដែលថា មនុស្សជាង ៨.០០០នាក់ ត្រូវបានសម្លាប់នៅក្នុងប្រទេសប៊ួគីណាហ្វាសូ កាលពីឆ្នាំមុន។