ភ្នំពេញ ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី០៧ ខែមីនា ឆ្នាំ២០២៤នេះ បានអញ្ជើញចូលរួមជាអធិបតីភាពក្នុងពិធីអបអរសាទរទិវាអន្តរជាតិនារី ៨មីនា ខួបលើកទី ១១៣ ឆ្នាំ២០២៤ ក្រោមមូលបទ៖ ស្ត្រី និងក្មេងស្រី ក្នុងបរិវត្តកម្មឌីជីថល។

នៅក្នុងឱកាសនោះ ឯកឧត្តមរដ្ឋមន្ត្រីមានប្រសាសន៍ថា ស្របតាមគោលជំហរនយោបាយដ៏ច្បាស់លាស់របស់រាជរដ្ឋាភិបាលកម្ពុជា ក្រសួងធនធានទឹក និងឧតុនិយមតែងតែផ្តល់អាទិភាព និងការគិតគូរខ្ពស់ដល់ស្ត្រី ដែលមកទល់ពេលបច្ចុប្បន្ននេះ ភាគរយនៃស្រ្តីក្នុងចំណោម មន្ត្រី បុគ្គលិកសរុបរបស់ក្រសួងបានបន្តកើនឡើង ហើយថ្នាក់ដឹកនាំជាស្ត្រីក៏មានចំនួនកាន់តែច្រើននៅគ្រប់កម្រិតជំនាញផងដែរ។

ឯកឧត្តមរដ្ឋមន្ត្រីបន្តថា រាជរដ្ឋាភិបាលកម្ពុជានៅគ្រប់អាណត្តិ តែងតែផ្តល់អាទិភាពខ្ពស់ដល់ស្ថានភាពស្ត្រីលើគ្រប់រូបភាព នយោបាយ វប្បធម៌ និងការអភិវឌ្ឍសមត្ថភាព ដោយបានកំណត់យ៉ាងច្បាស់នៅក្នុងផែនការយុទ្ធសាស្ត្រអភិវឌ្ឍ និងផែនការសកម្មភាព រួមជាមួយយន្តការអនុវត្តប្រកបដោយភាពប្រទាក់ក្រឡា ដែលមានក្រសួងកិច្ចការនារីជាសេនាធិការដ៏រឹងមាំ។ 

ជាមួយគ្នានេះ ឯកឧត្តមរដ្ឋមន្ត្រីបានរំឭក និងស្នើដល់ថ្នាក់ដឹកនាំក្រសួង ជាពិសេសគណៈកម្មការនារីប្រចាំក្រសួងធនធានទឹក និងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប បន្តអនុវត្តនូវកិច្ចការសំខាន់ៗមួយចំនួន ដើម្បីបន្តពង្រឹងការងារអាទិភាពចំពោះស្ត្រី ដែលក្នុងនោះរួមមាន៖ទី១.បន្តការកំណត់ឱ្យបានច្បាស់នូវបញ្ហាប្រឈម ឧបសគ្គនានាក្នុងការបំពេញការងារ បំពេញតួនាទីភារកិច្ចរបស់ស្ត្រី និងលើកវិធានការ ដើម្បីដោះស្រាយ ទី២.បន្តផ្តល់អាទិភាព និងលើកទឹកចិត្តដល់ស្ត្រីក្នុងការចូលរួមវគ្គបណ្តុះបណ្តាលនានា ជាពិសេសវគ្គបណ្តុះបណ្តាលជំនាញឌីជីថល និង ទី៣.បន្តកំណត់លក្ខណៈសម្បត្តិស្ត្រី និងលើកសំណើតែងតាំងស្ត្រី សម្រាប់មុខតំណែងដែលនៅទំនេរនិងរៀបចំបែបបទដំឡើងឋានន្តរស័ក្តិនិងថ្នាក់ តាមអតីតភាពការងារ និងតាមគោលការណ៍ច្បាប់ជាធរមាន៕

រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រី នៅគ្រប់វិស័យជាអាទិភាព ក្នុងរបៀបវារៈគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គម ដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ៕ អត្ថបទ ៖ ទូច សោភ័ណ