គ្រាប់កាំភ្លើងរថក្រោះអ៊ីស្រាអែលពីរគ្រាប់ដែលបានវាយប្រហារអ្នកសារព័ត៌មាន១ក្រុម នៅប្រទេសលីបង់ភាគខាងត្បូង កាលពីខែតុលាឆ្នាំកន្លងទៅនោះ បានសម្លាប់លោកអ៊ីសសាំ អាប់ដាឡាស់ (Issam Abdallah) មកពីអង្គភាពរ៉យទ័រ(Reuters) ដែលទំនងជាការផ្ទុះបាញ់ចេញពីកាំភ្លើងយន្ដ។

នោះមានន័យថា ក្រុមអ្នកសារព័ត៌មាន បានស្ថិតនៅក្រោមការវាយប្រហាររយ:ពេល១នាទី និង៤៥វិនាទី។

ការស្វែងរកការពិតទាំងនេះ គឺមានជាប់ទាក់ទងនៅក្នុងរបាយការណ៍ចុងក្រោយដែលត្រូវបានផ្សព្វផ្សាយនៅថ្ងៃព្រហស្បតិ៍ទី៧មីនាដោយចេញពីវិទ្យាស្ថានស្រាវជ្រាវ TNO ដែលនេះ បានធ្វើការវិភាគសម្រាប់សារព័ត៌មាន Reuters នៅឯកន្លែងពិសោធន៍របស់ខ្លួនក្នុងក្រុងឡាអេ។

ដូចគ្នានឹងការសម្លាប់លោកអាប់ដាឡាស់ដែរ អ្នកសារព័ត៌មាន៦នាក់ទៀតមកពីអង្គភាព Reuters អង្គភាពអាហ្សង់ ហ្វ្រង់ ប្រេស (Agence France-Press) និងអាល់ ជើហ្សៀរ៉ា (Al Jazeera) ក៏បានរងរបួសនៅក្នុងហេតុការនោះដែរ។

ការស៊ើបអង្កេតមួយរបស់Reutersក្នុងខែធ្នូ បានផ្ដោតទៅលើសេចក្ដីរាយការដំបូងៗរបស់TNOថា គ្រាប់កាំភ្លើងរថក្រោះធន១២០មីលីម៉ែត្រ ត្រូវបានចេញពីចម្ងាយ១,៣៤ម៉ែត្រពីខាងក្នុងប្រទេសអ៊ីស្រាអែល។

ឥឡូវនេះ ក្រុមស្រាវជ្រាវTNOនិយាយថា សំឡេងដែលបានថតដោយម៉ាស៊ីនថតវីដេអូអាល់ ជើហ្សៀរ៉ា នៅកន្លែងកើតហេតុបង្ហាញថា ក្រុមអ្នកសារព័ត៌មានក៏បានស្ថិតក្រោមការបាញ់ប្រហាពីគ្រាប់កាំភ្លើង០,៥០កាលីប៊ើរដែរ។

រថក្រោះប្រភេទម៉ើកាវ៉ា (Merkava) អាចត្រូវបានបំពាក់ទៅដោយកាំភ្លើងយន្ដធនធ្ងន់ដែលជាទូទៅនៅ មានជាប់ជាមួយនឹងកាំភ្លើងរថក្រោះ។

អ្នកយកពត៌មានReutersមិនអាចសម្រេចដោយឯករាជ្យបានថាតើក្រុមទាហានរថក្រោះអ៊ីស្រាអែលបានដឹងថា ខ្លួនពិតជាបានបាញ់លើអ្នកសារព័ត៌មាន ឬមិនដឹងថាតើកាំភ្លើងយន្ដនោះ បាញ់បានចំអ្នកណា មូលហេតុអ្វី

កងទ័ពការពារជាតិអ៊ីស្រាអែល មិនបានឆ្លើយតបចំពោះការសុំធ្វើអត្ថាធិប្បាយទេ៕