តុលាការជប៉ុនបានច្រានចោលពាក្យបណ្តឹងទាមទារឲ្យបិទម៉ាស៊ីនរ៉េអាក់ទ័រលេខ៣ ក្នុងរោងចក្រថាមពលអគ្គិសនីរបស់ក្រុមហ៊ុន Shikoku Electric Power នៅទីក្រុង Ikata របស់កោះ Shikoku ដែលនេះជាការសម្រេចផ្លូវការលើកដំបូង ពាក់ព័ន្ធនឹងជម្លោះផ្លូវច្បាប់ សម្រាប់រោងចក្រថាមពលនុយក្លេអ៊ែរ នៅភាគខាងលិចប្រទេសជប៉ុនមួយនេះ។ នេះបើតាមការផ្សាយជាសាធារណៈ ក្នុងសេចក្ដីរាយការណ៍របស់សារព័ត៌មាន NHK នៅថ្ងៃព្រហស្បតិ៍ (ទី៧ ខែមីនា) នេះ។

សេចក្តីសម្រេចរបស់តុលាការតំបន់ Oita ប្រឆាំងនឹងអ្នកស្រុកដែលព្រួយបារម្ភអំពីហានិភ័យគ្រោះធម្មជាតិនោះ បានអនុញ្ញាតឲ្យមានការដំណើរការជាធម្មតា សម្រាប់ម៉ាស៊ីនរ៉េអាក់ទ័រសកម្ម ដែលផលិតថាមពលអគ្គិសនីបាន ៨៩០មេហ្គាវ៉ាត់ និងដែលមានអាយុកាល ៣០ឆ្នាំហើយ។

គួរបញ្ជាក់ថា ក្រុមហ៊ុន Shikoku Electric បានប្រឈមជាមួយនឹងដីកាតុលាការចំនួន២ ដែលបង្គាប់ឲ្យបញ្ឈប់ដំណើរម៉ាស៊ីនរ៉េអាក់ទ័រនេះ ក្នុងឆ្នាំ២០១៧ និងឆ្នាំ២០២០ ប៉ុន្តែដីកាបង្គាប់ទាំង ២នេះ ត្រូវបានលុបចោលដោយតុលាការជាន់ខ្ពស់ នាពេលក្រោយមក៕