ភ្នំពេញ ៖ ក្រសួង​ការបរទេស​កម្ពុជា បញ្ជាក់​ថា ក្រុមហ៊ុន​ផលិត​អង្ករ​របស់​ឥណ្ឌា បាន​សម្រេច​បញ្ឈប់​ការប្រើ​ប្រាស់​ឈ្មោះ និង​រូប​ប្រាសាទ​អង្គរ​វត្ត​នៅ​លើ​សំបក​វេច​ខ្ចប់​ផលិត​ផល​របស់​ខ្លួន​ហើយ ក្រោយ​ពី​កម្ពុជា​បាន​តវ៉ា​ជំទាស់​នឹង​ការ​វេច​ខ្ចប់​បែប​នេះ។

ក្នុង​សេចក្ដី​ប្រកាស​ព័ត៌មាន​នៅ​ថ្ងៃ​នេះ ក្រសួង​ការបរទេស​កម្ពុជា បាន​បញ្ជាក់ ក្រសួង​ការបរទេស និង​ក្រសួង​ពាណិជ្ជកម្ម បាន​រក​ឃើញ​ផលិត​ផល​អង្ករ​បរទេស​ ត្រូវ​បាន​ដាក់​លក់​លើ​ទីផ្សារ​អនឡាញ​ដោយ​ប្រើ​ឈ្មោះ Angkor Wat Thai Hom Mali Jasmine Rice។

ក្រសួង​បញ្ជាក់​ទៀត​ថា ភាគី​កម្ពុជា និង​ភាគ​ី​រដ្ឋាភិបាល​ថៃ បាន​សហការ​ស្វែង​រក​ប្រភព​នៃ​ផលិត​ផល​អង្ករ​នេះ ហើយ​បាន​រក​ឃើញ​ថា ផលិត​ផល​អង្ករ​នេះ ត្រូវ​បាន​ផលិត​ឡើង​ដោយ​ក្រុមហ៊ុន​ឥណ្ឌា Voyage India ស្ថិត​នៅ​ក្នុង​រដ្ឋ​ Maharashtra របស់​ប្រទេស​ឥណ្ឌា។

បើ​តាម​សេចក្ដី​ប្រកាស​ព័ត៌មាន ក្រសួង​ការបរទេស​បាន​ជូន​ដំណឹង​ទៅ​ស្ថានទូត​កម្ពុជា​ប្រចាំប្រទេស​ឱ្យ​ឥណ្ឌា ឱ្យ​តវ៉ា​ទៅ​ភាគី​រដ្ឋាភិបាល​ឥណ្ឌា ដើម្បី​ទាមទារ​ឱ្យ​ក្រុមហ៊ុន Voyage India បញ្ឈប់​ការ​ប្រើ​ប្រាស់ឈ្មោះ​ និង​រូប​ប្រាសាទ​អង្គរ​វត្ត​របស់​កម្ពុជា​​ទៀត។

ក្រសួង​ការបរទេស​កម្ពុជា​អះ​អាង​ថា ក្រុមហ៊ុន​ឥណ្ឌា​មួយ​នេះ បាន​រំលោភ​លើ​ច្បាប់​ស្ដី​ពី​ម៉ាក​ពាណិជ្ជនាម ​ការ​ប្រកួត​ប្រជែង​ដោយ​មិន​ស្មោះ​ត្រង់ និង​រំលោភ​លើ​ច្បាប់​អន្តរជាតិ​ស្ដី​ពី​កិច្ច​ការពារ​កម្មសិទ្ធិ​ឧស្សាហកម្ម​ផង​ដែរ។

ក្រសួង​អះ​អាង​ទៀត​ថា ភាគី​រដ្ឋាភិបាល​ឥណ្ឌា​បាន​បញ្ជាក់​ថា ក្រុមហ៊ុន​មួយ​នេះ​បាន​បញ្ឈប់​ការ​ប្រើ​ប្រាស់​ឈ្មោះ និង​រូបប្រាសាទ​អង្គរ​វត្ត​លើ​សំបក​វេច​ខ្ចប់​ផលិត​ផល​របស់​ខ្លួន​ហើយ។

ប៉ុន្មាន​ថ្ងៃ​ថ្មីៗ​នេះ ផលិត​ផល​អង្ករ​មួយ ដែល​ត្រូវ​បាន​ដាក់​លក់​លើ​ទីផ្សារ​អនឡាញ បាន​បង្ហាញ​នូវ​ការ​វេច​ខ្ចប់​ដោយ​សំបក​ថង់​មាន​ឈ្មោះ​ និង​រូបប្រាសាទ​អង្គរ​វត្ត​របស់​ប្រទេស​កម្ពុជា ដែល​នាំ​ឱ្យ​មាន​ការ​រិះ​គន់​ពី​មហាជន​ផង​ដែរ។

កាល​ពី​សប្ដាហ៍​មុន កម្ពុជា​ក៏​បាន​បង្ហាញ​ការ​តវ៉ា​ជំទាស់​នឹង​សំណង់​ប្រាសាទ​ថ្មី​មួយ​នៅ​ក្នុង​ខេត្ត​បុរីរម្យ ប្រទេស​ថៃ ដែល​ត្រូវ​បាន​មហាជន​មើល​ឃើញ​ថា កំពុង​សាង​សង់​ឡើង​តាម​រចនាបថ​នៃ​ប្រាសាទ​អង្គរ​វត្ត​ ដែល​ជា​ស្ថាបត្យ​កម្ម​បុរាណ​របស់​កម្ពុជា៕អត្ថបទ ៖ សុធី