អភិបាលក្រុងតូក្យូ លោកស្រី Yuriko Koike ដឹងច្បាស់ថា តើបណ្តាញ និងការណែនាំ មានសារៈសំខាន់កម្រិតណា ក្នុងការកសាងអាជីព ដូច្នេះលោកស្រីត្រូវធ្វើឲ្យប្រាកដថា រដ្ឋបាលរបស់លោកស្រីផ្តល់ឱកាសទាំងនេះដល់ពួកស្ត្រី។

គួរបញ្ជាក់ថា លោកស្រី Koike គឺជាស្ត្រីម្នាក់ក្នុងចំណោមស្ត្រីតិចតួចណាស់ដែលកាន់មុខតំណែងជាន់ខ្ពស់ នៅក្នុងប្រទេសជប៉ុន ដែលសង្គមនេះនៅតែក្ដោបក្ដាប់ដោយពួកបុរស ហើយមនុស្សជាច្រើននៅតែរក្សាទស្សនៈដែលថា កន្លែងរបស់ពួកស្ត្រី គឺនៅក្នុងផ្ទះ។

លោកស្រីបានណែនាំនូវគម្រោងមួយចំនួនក្នុងប៉ុន្មានឆ្នាំថ្មីៗនេះ ក្នុងគោលបំណងផ្តល់សិទ្ធិអំណាចដល់ស្ត្រីផ្សេងទៀត នៅកន្លែងធ្វើការ ដោយផ្តល់កន្លែង ដើម្បីបង្កើតបណ្តាញ និងអភិវឌ្ឍចំណេះដឹងផ្នែកគ្រប់គ្រង ដែលកាលពីអតីតកាលដោយភាគច្រើនមានសម្រាប់តែបុរសប៉ុណ្ណោះ។

ក្នុងបទសម្ភាសន៍មួយនៅមុនទិវានារីអន្តរជាតិដែលត្រូវប្រារព្ធនៅថ្ងៃទី៨ ខែមីនានោះ លោកស្រី Koike បានប្រាប់សារព័ត៌មានថា៖ «មិនមានប្រទេសដទៃផ្សេងទៀត នៅលើពិភពលោកដែលកម្លាំងរបស់ស្ត្រីត្រូវបានប្រើប្រាស់តិចតួចបែបនេះទេ។ សម្រាប់ប្រទេសជប៉ុន និងទីក្រុងតូក្យូ របៀបទាញយកថាមពលដែលមិនទាន់ត្រូវបានប្រើពីស្ត្រី គឺមានសារៈសំខាន់ណាស់»។

ក្នុងរយៈពេល ១ទសវត្សរ៍កន្លងមកនេះ ក្រោមសម្ពាធពីរដ្ឋាភិបាលជប៉ុន និងផ្សារហ៊ុនតូក្យូ ក្រុមហ៊ុនជប៉ុនជាច្រើន បានទទួលជោគជ័យក្នុងការជំរុញចំនួននាយកប្រតិបត្តិជាស្ត្រីឲ្យមានខ្ពស់ជាងមុន។ តែទោះបីជាមានការរីកចម្រើនបែបនេះក្ដី ក៏មេដឹកនាំជាស្ត្រីបាននិយាយថា ស្ត្រីជប៉ុនដែលមានការទទួលខុសត្រូវ ក្នុងការគ្រប់គ្រង គឺនៅតែជាតំណាងដ៏តិចតួច នៅក្នុងក្រុមហ៊ុនភាគច្រើន៕