បច្ចុប្បន្នស្រ្ដីដែលកំពុងបម្រើការងារជាមន្ត្រីរាជការ និងបុគ្គលិករបស់​មនី្ទរពេទ្យ​បង្អែក​រាជ​ធានី​ភ្នំពេញ​បាន​រួមចំណែកយ៉ាងសំខាន់​ក្នុងការលើកកម្ពស់​សុខុមាលភាពជូន​ប្រជាពលរដ្ឋ​មក​ពីគ្រប់​ទិសទី​ឲ្យកាន់តែប្រសើរ។

ជាក់ស្តែងនៅថ្ងៃទិវានារីអន្តរជាតិ ៨ ខែមីនា ២០២៤ ក្រោមប្រធានបទ «ស្រី្ត និងក្មេងស្រី ក្នុង​បរិវត្តកម្ម​ឌីជីថល» ស្រ្ដីជាគ្រូពេទ្យកំពុងផ្តល់សេវាសុខាភិបាលយ៉ាងមមាញឹកជូនប្រជាពលរដ្ឋ នៅ​មនី្ទរពេទ្យបង្អែករាជធានីភ្នំពេញ លើផ្នែកផ្សេងៗគ្នា។ 

ក្នុង​ឱកាសនេះស្រ្ដីដែលជាគ្រូពេទ្យរួមមាន លោកស្រី ញឹម សុភាព នាយសាលផ្នែកសម្ភព និង​រោគស្រី្ត, លោកស្រីឱសថការី នៅ បូនីឡា ប្រធានផ្នែកមនី្ទរពិសោធន៍, លោកស្រី ប៊ុនធឿន រចនា ចក្ខុគិលានុប្បដ្ឋាយិកា ផ្នែកចក្ខុរោគ និងលោកស្រី ស៊ុន យ៉ាណ្ណាក់ ចក្ខុគិលានុប្បដ្ឋាយិកា ផ្នែក​ចក្ខុរោគ នៃមន្ទីរពេទ្យបង្អែករាជធានីភ្នំពេញ បានលើកឡើង​ថា​ពួក​គាត់​ពិត​ជា​សប្បាយ​រីករាយ​ណាស់ដែលរាជរដ្ឋាភិបាលតែងតែលើកកម្ពស់ និងផ្តល់​ឱកាស​ឲ្យ​ស្រី្តគ្រប់​រូប​បម្រើ​ការងារ​ក្នុង​មនី្ទរ​ពេទ្យ និង​មាន​សិទ្ធិ​ស្មើភាព​គ្នាជាមួយ​បុរស​អាច​ផ្តល់​សេវា​ថែទាំ​សុខភាព​ជូន​ប្រជាពលរដ្ឋ​ក្នុង​ផ្នែក​នីមួយៗ​បានដូចគ្នា។

ក្រុមអ្នកគ្រូពេទ្យបានប្ដេជ្ញា ខិតខំពេញការងារប្រកបដោយស្មារតី ឆន្ទៈ ក្នុងការងារ​ចំពោះ​មុខ​ឲ្យ​កាន់​តែ​ប្រសើរឡើង ជាពិសេសផ្តល់សេវាពិនិត្យ ព្យាបាល ថែទាំ បម្រើប្រជាពលរដ្ឋ​ឱ្យ​បាន​ល្អ​ប្រ​សើរ​ថែម​ទៀត ដើម្បីរួមចំណែកស្តារ និងអភិវឌ្ឍប្រទេសជាតិ សុខុមាលភាពប្រជាជន។

សូមជម្រាថា រាជរដ្ឋាភិបាលកម្ពុជា បានពង្រីកការវិនិយោគជាបន្តបន្ទាប់លើការអភិវឌ្ឍសង្គម និង​អនុវត្ត​កម្ម​វិធីនយោបាយឆ្លើយតបនឹងយេនឌ័រ និងការពារសិទ្ធិមនុស្ស ជាពិសេស ការលើក​កម្ពស់​សិទ្ធិ​ស្រ្តី​ឲ្យបានកាន់តែទូលំទូលាយ។ ក្នុងនោះ សម្រាប់វិស័យអប់រំ គម្លាតយេនឌ័រ​នៅ​កម្រិត​បឋម​សិក្សា និងមធ្យមសិក្សាត្រូវបានលុបបំបាត់។ ស្ត្រីកម្ពុជាបានចូលរួមយ៉ាងសកម្ម និង​ជា​តួអង្គ​ដ៏​សំខាន់ នៅក្នុងការលើកកម្ពស់ស្ថានភាពជីវភាពគ្រួសារ និងកំណើនសេដ្ឋកិច្ចគ្រួសារ និង​សង្គម​ជាតិ។ ស្ត្រីមានអត្រាប្រមាណ ៦៩% ជាអ្នកតំណាងនៅក្នុងចំណោមអង្គភាព សេដ្ឋកិច្ច​សរុប​នៅ​កម្ពុជា​។ កម្ពុជាទទួលបានការដាក់ចំណាត់ថ្នាក់ខ្ពស់បំផុតនៅក្នុងចំណោមបណ្ដាប្រទេស លើ​សកល​លោក ដែលមានសេរីភាពសម្រាប់ស្ត្រី ក្នុងការចាប់ផ្តើមធ្វើអាជីវកម្មនិងធុរកិច្ច។

ការចូលរួមរបស់ស្ត្រីក្នុងតួនាទីធ្វើសេចក្តីសម្រេច បានកើនឡើងជាបន្តបន្ទាប់ តាមរយៈ​ការ​គាំទ្រ​ពី​រាជ​រដ្ឋាភិបាល និងថ្នាក់ដឹកនាំនៅគ្រប់កម្រិត ជាពិសេស ការប្តេជ្ញាចិ​ត្ត​ផ្នែក​នយោបាយ​ក្នុង​ការ​ដាក់​ចេញ​វិធានការជាវិជ្ជមាន ក្នុងការជ្រើសរើសក្របខ័ណ្ឌមន្ត្រីរាជការថ្មីតាមក្រសួង ស្ថាប័ន ដោយ​កំណត់​ឱ្យ​មានអត្រាចំនួនស្ត្រីពី២០% ទៅ៥០%។ វប្បធម៌អហិង្សា សីលធម៌សង្គម និងការ​ថែ​រក្សា​ភាព​ថ្លៃថ្នូររបស់ស្ត្រី និងតម្លៃគ្រួសារខ្មែរ ត្រូវបានលើកកម្ពស់ជា បន្តបន្ទាប់ ដោយ​ចាត់​ទុកថា​ជា​កត្តា​ចាំបាច់មួយមិនអាចខ្វះបាន សម្រាប់ភាពជាពលរដ្ឋ ក្នុងសង្គមដែលមាន អារ្យធម៌ខ្ពស់ ប្រកប​ដោយសីលធម៌ សមធម៌ និងបរិយាបន្ន៕ អត្ថបទ រដ្ឋា