កងកម្លាំងជាស្ត្រីធ្វើការកំចាត់មីន និងបោសសម្អាតគ្រាប់យុទ្ធភណ្ឌមិនទាន់ផ្ទុះ នៃ​អង្គភាព​ស៊ីម៉ាក់​ជា​ច្រើន​រូបសុទ្ធតែបង្ហាញពីឆន្ទៈមោះមុត និងភាពក្លាហានហ៊ានពុះពារគ្រប់ឧបសគ្គ ក្នុងសមរភូមិ​ចំការ​មីន ព្រមទាំងបានជំរុញ និងលើកទឹកចិត្តដល់ស្ត្រីដទៃទៀត បន្តចូលរួម​បំពេញ​ការងារ​ក្នុង​វិស័យ​បោស​សម្អាតមីននេះដើម្បីធ្វើឲ្យប្រទេសកម្ពុជាអស់មីន និងលែង​មាន​ជនរង​គ្រោះ​ដោយសារ​មីន​តទៅទៀត។

យុទ្ធនារី សៀ ផានិត ដែលជាអ្នកបង្វឹកសត្វសុនខ​នៅ​វិទ្យាស្ថាន​កម្ចាត់​មីន​ខេត្តកំពង់ឆ្នាំង​បាន​ប្រាប់​ឲ្យ​ដឹង​ថា បើទោះបីជាការងារក្នុងវិស័យមីននេះជួបបញ្ហាប្រឈម និងគ្រោះថ្នាក់ ឬ​លំបាក​យ៉ាង​ណា ក៏ខ្លួនពេញចិត្ត ពីព្រោះជាការងារដើម្បីសុខសុវត្ថិភាព និងភាព​រីក​ចម្រើន​របស់​ប្រជាពលរដ្ឋ និងសង្គមជាតិ។

មិនខុសគ្នានោះយុទ្ធនារី សៅ រដ្ឋា បានជំរុញ និងលើកទឹកចិត្តដល់ស្ត្រីៗដទៃទៀត ត្រូវ​ចាប់​យក​នូវ​ការងារ​ណា​ដែល​ខ្លួនស្រឡាញ់ ហើយកុំគិតថាការងារមួយចំនួន ដូចជាការងារក្នុងវិស័យ​មី​ន​នេះ​ គឺសម្រាប់តែបុរសៗឲ្យសោះ។

ស្របពេលដែលពិភពអបអរសាទរទិវាអន្តរជាតិនារី៨ មីនាឆ្នាំ២០២៤ ក្រោមប្រធានបទ «ស្ត្រី និង​ក្មេង​ស្រីក្នុងបរិវត្តកម្មឌីជីថល» តំណាងឲ្យស្ត្រីនៃអង្គភាពស៊ីម៉ាក់ទាំងអស់ បានប្តេជ្ញា​ចិត្ត​ខិតខំ​បំពេញ​ភារកិច្ច​ឲ្យ​កាន់តែខ្លាំងឡើងថែមទៀត ដើម្បី​លើក​កម្ពស់​ការ​ចូលរួម​ដោយ​ស្មើភាព​របស់​ស្ត្រីក្នុង​បោស​សម្អាតយុទ្ធភ័ណ្ឌមិនទាន់ផ្ទុះ និងគ្រាប់មីនឱ្យអស់ពីកម្ពុជា។

សូមជម្រាបជូនថា ស្ត្រីកំពុងបម្រើការងារនៅក្នុងអង្គភាពស៊ីម៉ាក់បច្ចុប្បន្នមានចំនួន ៣៤០ ដែល​សុទ្ធ​តែមានជំនាញ និងកំពុងតែសកម្មភាពបោសសម្អាតមីន និងគ្រាប់យុទ្ធភណ្ឌ​មិនទាន់​ផ្ទុះដែល​មាន​នៅ​ក្នុង​ផ្ទៃដី និងផ្ទៃក្រោមបាតទឹកស្ទឹងបឹងទន្លេ ធ្វើយ៉ាងណាដើម្បីសុខសុវត្ថិភាព និង​សន្តិសុខ​ សម្រាប់ប្រជាពលរដ្ឋ និងសង្គមជាតិ៕ អត្ថបទ៖ ភារម្យ