បច្ចុប្បន្នទូទាំងប្រទេសក្នុងវិស័យឯកជន គឺមានស្ត្រីប្រមាណជាង ៦០% បាន​និង​កំពុង​ធ្វើ​ការងារ​ក្នុង​ភាពអ្នកដឹកនាំជាម្ចាស់ និងជាអ្នកគ្រប់គ្រង សហគ្រាស ក្រុមហ៊ុនឯកជន ហើយ​តាមរយៈ​ខួប​លើក​ទី១១៣ ទិវាអន្តរជាតិនារី ៨ មីនា ឆ្នាំ២០២៤នេះ បណ្តាស្ត្រីក្នុងតួនាទីជាម្ចាស់សហគ្រាស អ្នក​ដឹកនាំ គ្រប់គ្រងក្រុមហ៊ុន បានអំពាវនាវគ្រប់ស្ត្រីរូបខំប្រឹងរៀនបង្កើនសមត្ថភាព ប្រើប្រាស់​ជំនាញ​​របស់ខ្លួន ដើម្បីក្លាយជាឆ្អឹងខ្នងសេដ្ឋកិច្ចនៅក្នុងគ្រួសារ និងសង្គមជាតិ។

លោក​ជំទាវ ឧកញ៉ា កែវ មុំ ប្រធានសភាមុខរបរ និងមីក្រូសហគ្រាសកម្ពុជា និងជា​សមាគម​សហគ្រិន​ស្ត្រី​កម្ពុជា ហើយក៏ជាម្ចាស់សហគ្រាស ក្រុមហ៊ុនផលិតនំស្រួយ លីលី បានថ្លែងថា ស្រប​ពេលដែលរាជរដ្ឋាភិបាលកំពុងអនុវត្តគោលនយោបាយលើកទឹកចិត្ត លើកកម្ពស់នារី ក្នុង​ភាព​ជាអ្ន​ក​ដឹកនាំ និងផ្តល់លក្ខខ័ណ្ឌល្អៗ ផ្តល់ការស​ម្រប​សម្រួល​ល្អជូ​ន​ចំពោះ​បណ្តា​ម្ចាស់​សហ​គ្រាស​ជាស្ត្រី និងក្នុងឱកាសទិវានារីអន្តរជាតិ ៨ មីនានេះ លោកជំទាវ​បាន​អំពាវនាវ​ឲ្យ​ស្ត្រី​ដែល​កំពុង​ស្ថិត​ក្នុងសិក្សាជំនាញក្តី និងកំពុងបម្រើការងារតាមសហគ្រាស ក្រុមហ៊ុនក្តី ត្រូវខិតខំ​ពង្រឹង​សមត្ថភាព​ខ្លួន និងសាកល្បង បង្កើតអាជីវកម្ម សហគ្រាស ក្រុមហ៊ុនដោយខ្លួនឯង ដើម្បីជំរុញ​សេដ្ឋកិច្ច​គ្រួសារ និងសេដ្ឋកិច្ចជាតិឱ្យរីកចម្រើនថែមទៀត។

ចំណែកលោកស្រី ឌួង គីមឡា នាយិកា​ផ្នែក​ប្រាក់​សន្សំ​នៅ​ធនាគារ​ឯកជន​មួយ​នៅ​កម្ពុជា​លើក​ឡើង​ថា នៅក្នុងដំណើរជំរុញលើកកម្ពស់ស្ត្រី ក្នុងភាពជាអ្នកដឹកនាំ និងជាម្ចាស់សហគ្រាស រាជ​រដ្ឋាភិបាល​បានផ្តល់ទុន ផ្តល់ប្រាក់កម្ចី ក្នុងកម្រិតអាត្រាការប្រាក់ទាបបំផុត ជូនបណ្តា​ម្ចាស់​សហគ្រាស​ខ្នាតតូច ខ្នាតមធ្យមនានា ដែលដឹកនាំដោយស្រ្តី។ លោកស្រី ក៏បាន​អំពាវ​នាវ​ដល់​ស្ត្រី​ ឬ​ក្មេង​ស្រីប្រើប្រាស់ចំណេះដឹងជំនាញរបស់ខ្លួនធ្វើការរួមគ្នាជាមួយបុរស ដើម្បីជំរុញសហគ្រាស និង​ការងារ​ឱ្យ​បានរីកចម្រើន។

យោងតាមការស្រាវជ្រាវរបស់សភាមុខរបរ និងមីក្រូសហគ្រាសកម្ពុជា បច្ចុប្បន្ន​ទូទាំង​ប្រទេស​មាន​សហគ្រាសខា្នតតូច ខ្នាតមធ្យមសរុបជាង ៥០ ម៉ឺនសហគ្រាស ក្នុងនោះសហគ្រាស ក្រុម​ហ៊ុន​ជាង ៦០% ពោលគឺមានសហគ្រាសប្រមាណជាង ៣០ម៉ឺនសហគ្រាស គឺមានម្ចាស់ គ្រប់​គ្រង ដឹកនាំដោយស្ត្រី៕ អត្ថបទ៖ ស៊ុម សុខជា