កំពង់ស្ពឺ៖ ឯកឧត្ដម អ៊ិន ចន្ថា អនុរដ្ឋលេខាធិការក្រសួងអភិវឌ្ឍន៍ជនបទបានលើកឡើងថា ភូមិគំរូ គឺភូមិឋានដែលមានភាពសុខដុមនីយកម្ម ហេដ្ឋារចនាសម្ព័ន្ធរូបវន្ដ សេវាសង្គមសមស្រប ធានាបាននូវចរន្ដសេដ្ឋកិច្ច និងនិរន្ដរភាពប្រាក់ចំណូលគ្រួសារ ដោយរក្សាបាននូវធនធាន បរិស្ថាន វប្បធម៌ ដែលប្រជាពលរដ្ឋមានភាពជាម្ចាស់ និងផ្នត់គំនិតជាអ្នកដឹកនាំក្នុងការបង្កើតទស្សនវិស័យឱ្យក្លាយជាការពិត។ ឯកឧត្ដមលើកឡើងបែបនេះក្នុងឱកាសឯកឧត្ដមបានដឹកនាំក្រុមការងារ នៃនាយកដ្ឋានអភិវឌ្ឍន៍សហគមន៍ចុះពិនិត្យ វាយតំលៃលក្ខណៈវិនិច្ឆ័យ និងតាមដានការរស់របស់ប្រជាពលរដ្ឋក្នុងភូមិសូវង្សលើ ស្ថិតក្នុងសង្កាត់វាលពង្ស ក្រុងឧដុង្គម៉ែជ័យ ខេត្តកំពង់ស្ពឺ នៅព្រឹកថ្ងៃទី៨ ខែមីនា ឆ្នាំ២០២៤។

ឯកឧត្ដម អ៊ិន ចន្ថា បានលើកឡើងថា ភូមិសូវង្សលើ គឺជាភូមិគំរូមួយ ដែលទទួលបានការគាំទ្រពីគម្រោង “ការអភិវឌ្ឍន៍ជនបទដោយប្រើប្រាស់វិធីសាស្ត្រចលនាភូមិថ្មី” ដែលជាជំនួយឥតសំណងរបស់រដ្ឋាភិបាលកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) ក្រោមការសម្របសម្រួលដឹកនាំអនុវត្តន៍ដោយក្រសួងអភិវឌ្ឍន៍ជនបទ កាលពីឆ្នាំ ២០១៤-២០១៨។ ហេដ្ឋារចនាសម្ព័ន្ធទាំងអស់នៅក្នុងភូមិនេះ ត្រូវបានកសាង និងរៀបចំឱ្យមានរបៀបរៀបរយ ផ្លូវក្នុងភូមិត្រូវបានចាក់បេតុងខ្វាត់ខ្វែង បណ្តាញទឹកស្អាត និងអគ្គិសនីត្រូវបានតភ្ជាប់ទៅគ្រប់ផ្ទះប្រជាពលរដ្ឋ។

អនុរដ្ឋលេខាធិការក្រសួងអភិវឌ្ឍន៍ជនបទរូបនេះបានបញ្ជាក់បន្ថែមថា រាជរដ្ឋាភិបាលកម្ពុជា អាណត្តិទី៧ ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីបានដាក់ចេញនូវយុទ្ធសាស្ត្រគន្លឹះសំខាន់ៗ ដើម្បីជាស្នូលក្នុងការកំណែទម្រង់ការដឹកនាំឈានទៅលើកកម្ពស់ជីវភាពរស់នៅរបស់ប្រជាពលរដ្ឋ។ និយាយជារួម និងនិយាយដោយឡែក គឺត្រូវតភ្ជាប់ផ្លូវ ទឹក ភ្លើង ទៅដល់លំនៅដ្ឋានរបស់ប្រជាពលរដ្ឋ និងបង្កើតការងារដែលជាប្រភពចំណូលធានាដល់និរន្តរភាពសេដ្ឋកិច្ចគ្រសារផងដែរ។

ក្នុងឱកាសនោះឯកឧត្ដម បានលើកទឹកចិត្ត និងជំរុញបន្ថែមដល់បងប្អូនប្រជាពលរដ្ឋដែលរស់នៅក្នុងភូមិគំរូនេះឱ្យបង្កើនការរស់នៅប្រកបដោយបរិស្ថានល្អ បរិយាកាសបរិសុទ្ធ មានផាសុខភាព ក្រៅពីការងារ ត្រូវខិតខំក្នុងការដាំដុះ ចិញ្ចឹមសត្វ ដើម្បីទទួលបានប្រាក់ចំណូលបន្ថែម ហើយជាងនេះត្រូវចូលរួមថែរក្សានូវរាល់សមិទ្ធផលដែលមាន ដើម្បីធានាដល់ការប្រើប្រាស់យូរអង្វែង និងអាចឈានទៅដណ្តើមយកតំណែងផ្កាយបីភូមិគំរូនាពេលខាងមុខ៕ អត្ថបទ៖ បាន សុខរិទ្ធ