បច្ចុប្បន្នវត្តមានស្ត្រីមានពិការភាព កាន់តែច្រើនបានឱកាសបំពេញការងារនៅតាមក្រសួងស្ថាប័ន ឬបង្កើតជាអាជីវកម្មដោយខ្លួនឯង។ ការទទួលបានឱកាសនេះ ក៏ភ្ជាប់ជាមួយការព្យាយាមជម្នះគ្រប់ឧបសគ្គ ពង្រឹងសមត្ថភាពចំណេះដឹងខ្លួនឱ្យខ្លាំងផងដែរ។ នេះជាការលើកឡើងរបស់ មន្ត្រីជាស្ត្រីមានពិការភាព ដែលកំពុងបម្រើការងារនៅក្រសួងសង្គមកិច្ច អតីតយុទ្ធជន និងយុវនីតិសម្បទា។
ក្នុងឱកាសទិវាអន្តរជាតិនារី ៨មីនានេះ មន្ត្រីជាស្ត្រីមានពិការភាពបំពេញការងារនៅក្រសួងសង្គមកិច្ច អតីតយុទ្ធជន និងយុវនីតិសម្បទា បានបង្ហាញនូវក្ដីសាទរ និងចែករំលែកនូវបទពិសោធន៍ ដោយរម្លេចថា ស្ត្រីមានពិការភាពគឺមានសមត្ថភាពដូចជាមនុស្សមិនមានពិការភាពផងដែរ។
ពួកគាត់លើកឡើងជាបទពិសោធន៍ផ្ទាល់ថា ការរស់នៅជាមួយពិការភាពគឺត្រូវជួបឧបសគ្គច្រើនលើសលប់ បើធៀបជាមួយនឹងមនុស្សមិនមានពិការភាព។ អតីតកាលពួកគេឆ្លងកាត់ការរើសអើង ភាពពិបាកក្នុងការធ្វើដំណើរ និងភាពពិបាកជាច្រើនផ្សេងទៀត តែពួកគេនៅតែជម្នះរឿងគ្រប់យ៉ាង តស៊ូមិនបោះបង់ការសិក្សា រហូតបច្ចុប្បន្នបានក្លាយខ្លួនជាមន្ត្រីបំពេញការងារនៅក្រសួងសង្គមកិច្ច ក្លាយខ្លួនជាមនុស្សឯករាជ្យដូចមនុស្សមិនមានពិការភាព។
បណ្ដាស្ត្រីមានពិការភាពបន្តថា បច្ចុប្បន្ននេះពិតជាពេញចិត្តនូវអ្វីដែលកើតចេញពីការព្យាយាមរបស់ខ្លួន។ ក្នុងនាមជាស្ត្រីមានពិការភាព ពួកគេសូមលើកទឹកចិត្ត ឱ្យស្ត្រីមានពិការភាពផ្សេងទៀត មិនត្រូវផ្ដេកផ្ដួលលើពាក្យថាពិការនោះទេ។ ការព្យាយាមមិនបោះបង់ ពង្រឹងសមត្ថភាពចំណេះដឹងខ្លួនឱ្យខ្លាំងជាភាពចាំបាច់ ដើម្បីទទួលបានឱកាសដែលផ្ដល់ជូន។
រាជរដ្ឋាភិបាលកម្ពុជា បានដាក់ចេញអនុក្រឹត្យ កំណត់ឱ្យស្ថាប័នរដ្ឋ ជ្រើសរើសមន្រ្តីមានពិការភាពឱ្យចូលបម្រើការងារចំនួន២ភាគរយ និងកំណត់ឱ្យស្ថាប័នឯកជនជ្រើសរើសបុគ្គលិកមានពិការភាពចូលបម្រើការងារចំនួន១ភាគរយ នៃចំនួនមន្រ្តី រឺបុគ្គលិករបស់ខ្លួន។ ជាការអនុវត្តតាមអនុក្រឹត្យ គឺមាន ជនមានពិការភាពសរុប ចំនួន ៩៥៨៧នាក់កំពុងបម្រើការងារ ទាំងក្នុងក្រសួងស្ថាប័ន និងឯកជន ក្នុងឆ្នាំ២០២២។ នេះជាការលើកឡើងឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច នាពេលកន្លងទៅក្នុងឱកាសទិវាមនុស្សគ-ថ្លង់ កម្ពុជា លើកទី១១ និងអន្តរជាតិ លើកទី៦៦៕ អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
