ភ្នំពេញ÷ គណៈកម្មាធិការដឹកនាំគម្រោងបញ្ជរតែមួយជាតិ និងពង្រីកការអនុវត្តប្រព័ន្ធបញ្ជរតែមួយជាតិនាពេលដ៏ខ្លីខាងមុខ ទៅកាន់ ក្រសួង-ស្ថាប័នមួយចំនួនទៀត សម្រាប់ការចេញអាជ្ញាប័ណ្ណ, វិញ្ញាបនបត្រ, លិខិតអនុញ្ញាត និងឯកសារផ្សេងទៀតសម្រាប់ទំនិញ នាំចេញ-នាំចូល។

 ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈ កម្មាធិការដឹកនាំគម្រោងបញ្ជរតែមួយជាតិ នៅថ្ងៃទី៧ ខែ មីនា ឆ្នាំ ២០២៤ នេះ បានដឹកនាំកិច្ចប្រជុំគណៈកម្មាធិការដឹកនាំគម្រោង បញ្ជរតែមួយជាតិលើកទី ៤ ដើម្បីពិនិត្យអំពីវឌ្ឍនភាពនៃការអនុវត្តគម្រោងបញ្ជរតែមួយជាតិដំណាក់កាលទី៣ ដែលត្រូវបានប្រកាស ដាក់ឱ្យអនុវត្តក្នុងកិច្ចប្រជុំ របស់គណៈកម្មាធិការដឹកនាំគម្រោងបញ្ជរតែមួយជាតិលើកទី៣ កាលពីថ្ងៃទី ៣ ខែ មករា ឆ្នាំ២០២៣ និង មានរយៈពេលអនុវត្តចំនួន ១២ ខែកន្លងមក ។

ទាក់ទិនប្រព័ន្ធបញ្ជរតែមួយជាតិនេះ គឺពាក់ព័ន្ធនឹងការចេញអាជ្ញាប័ណ្ណ, វិញ្ញាបនបត្រ, លិខិតអនុញ្ញាត និងឯកសារផ្សេង ទៀតក្នុងទម្រង់អេឡិកត្រូនិក សម្រាប់ទំនិញនាំចេញ-នាំចូល ដែលស្ថិតក្នុងបញ្ជីទំនិញហាមឃាត់ និងទំនិញជាប់កម្រិតកំណត់ ព្រមទាំងទំនិញដែលទទួលបានការលើកលែងពន្ធ និងអាករស្របតាមច្បាប់ និងបទប្បញ្ញត្តិជាធរមាន ។ គម្រោងបញ្ជរតែមួយជាតិ ដំណាក់កាលទី៣ បានពង្រីកវិសាលភាពទៅក្រសួង-ស្ថាប័ន ចំនួន ១១ បន្ថែមទៀត ។ ទន្ទឹមនេះ ប្រព័ន្ធបញ្ជរតែមួយជាតិ ក៏បាន បន្ថែមមុខងារថ្មីចំនួន៤រួមមាន៖ មុខងារគ្រប់គ្រងហានិភ័យ, មុខងារឃ្លាំងឯកសារពាណិជ្ជកម្ម, មុខងារប្រតិបត្ដិករសេដ្ឋកិច្ចបាន ទទួលការអនុញ្ញាត និងមុខងារគ្រប់គ្រងគណនីប្រើប្រាស់តែមួយ។

អង្គប្រជុំបានវាយតម្លៃខ្ពស់ និងកត់សម្គាល់លើវឌ្ឍនភាពនៃការអនុវត្តគម្រោង ដែលក្រសួង-ស្ថាប័នចំនួន៦រួមមាន៖ ក្រសួង កសិកម្ម រុក្ខាប្រមាញ់ និងនេសាទ, ក្រសួងបរិស្ថាន, ក្រសួងរ៉ែ និងថាមពល, ក្រសួងវប្បធម៌ និងវិចិត្រសិល្បៈ, ធនាគារជាតិនៃកម្ពុជា, ក្រសួងប្រៃសណីយ៍ និងទូរគមនាគមន៍ បានចូលរួមអនុវត្តសាកល្បងប្រើប្រាស់ប្រព័ន្ធបញ្ជរតែមួយជាតិ ចាប់ពីថ្ងៃទី ២៥ ខែ ធ្នូ ឆ្នាំ ២០២៣ កន្លងមក និងក្រសួង-ស្ថាប័នមួយចំនួនបានត្រៀមលក្ខណៈសម្បត្តិរួចរាល់ ដើម្បីចូលរួមអនុវត្តប្រព័ន្ធ បញ្ជរតែមួយជាតិ នាពេលដ៏ខ្លីខាងមុខ៕

អត្ថបទ៖ សុន រ៉ាឌី,