ស្របពេលដែលខែពិធីបុណ្យរ៉ាម៉ាដាន ខិតជិតចូលមកដល់ក្នុងឆ្នាំនេះ ប្រជាពលរដ្ឋឥណ្ឌូនេស៊ីជាច្រើន ដែលជួបការលំបាកដោយសារតម្លៃទំនិញហក់ឡើងខ្ពស់ បានសម្រុកដើរផ្សារ បើទោះបីជាមានសំពាធអតិផរណាស្បៀងអាហារនៅក្នុងប្រទេសរបស់ពួកគេក៏ដោយ ។

លោកយាយ Evi Sofiatini វ័យ ៧០ឆ្នាំ ដែលបានដើរផ្សារនៅទីក្រុងហ្សាកាតា និយាយថា ខ្ញុំមានការភ្ញាក់ផ្អើលខ្លាំងចំពោះការឡើងថ្លៃទំនិញគ្រប់មុខ ជាក់ស្តែងដូចជាសាច់មាន់ដែលធ្លាប់មានតម្លៃ ៣,៥៣ដុល្លារ ឥឡូវឡើងថ្លៃដល់ ៣,៨៤ដុល្លារ ក្នុង ១គ.ក ។

លោកយាយ Sofiatini បន្តថា ខ្ញុំមានអារម្មណ៍ពិបាក និងព្រួយបារម្ភចំពោះស្ថានភាពបែបនេះ ។ 

អង្កដែលជាអាហារសំខាន់សម្រាប់ពលរដ្ឋភាគច្រើនក្នុងចំណោមពលរដ្ឋ ២៧០លាននាក់របស់ឥណ្ឌូនេស៊ី តម្លៃរបស់វា បានកើនឡើងជាង ១៦ភាគរយ ចាប់តាំងពីឆ្នាំមុនរហូតមក ស្របពេលដែលបាតុភូតអាកាសធាតុអែល នីញ៉ូ បានកាត់បន្ថយកម្រិតភ្លៀង តាមតំបន់ភាគធំនៅអាស៊ី កាលពីឆ្នាំ ២០២៣ កាត់បន្ថយទិន្នផលធុញ្ញជាតិ និងធ្វើឲ្យមានសំពាធអតិផរណាស្បៀងអាហារនៅក្នុងប្រទេសមួយនេះ ។

អ្នកស្រី Juli Sutarno គឺជាអាជីវករលក់សាច់មាន់មួយរូបនិយាយថា តម្លៃបច្ចុប្បន្នរបស់សាច់មាន់ បានឡើងថ្លៃតាំងពីថ្ងៃមុនខែពិធីបុណ្យរ៉ាម៉ាដានឆ្នាំមុនមកម្ល៉េះ ហើយអ្នកស្រីមានអារម្មណ៍ស្ទាក់ស្ទើរក្នុងការលក់ដល់អតិថិជន ។

ស្របពេលដែលពិធីបុណ្យរ៉ាម៉ាដាន ចាប់ផ្តើមនៅថ្ងៃចន្ទ ឬថ្ងៃអង្គារ ដើមសប្តាហ៍ក្រោយ ដោយអាស្រ័យលើដំណើររបស់ព្រះច័ន្ទនោះ អតិផរណាស្បៀងអាហារ មិនមែនជារឿងតែមួយធ្វើឲ្យប៉ះពាល់ដល់អារម្មណ៍ពលរដ្ឋនៅឥណ្ឌូនេស៊ីប៉ុណ្ណោះទេ ដែលជាប្រទេសមានជនមូស្លីមច្រើនបំផុតនៅលើពិភពលោក ៕