ប្រធានាធិបតីសហដ្ឋអាមេរិក លោក Joe Biden បានព្រមានកាលពីថ្ងៃសុក្រថា វានឹងមានភាពលំបាកខ្លាំងដើម្បីធានាបានបទឈប់បាញ់ រវាងអ៊ីស្រាអែល និងក្រុមហាម៉ាស នៅខែដ៏ពិសិដ្ឋរបស់ពលរដ្ឋមូស្លីមក្នុងខែបុណ្យរ៉ាម៉ាដាន។ លោក Biden បានប្រាប់អ្នករាយការណ៍ព័ត៌មាន នៅពេលត្រូវបានគេសួរថាតើកិច្ចព្រមព្រៀងដើម្បីបញ្ឈប់ជម្លោះរយៈពេលប្រាំខែ អាចទទួលបាននៅក្នុងខែបុណ្យរ៉ាម៉ាដាន ដែលនឹងចាប់ផ្តើមនៅថ្ងៃអាទិត្យដែរឬទេ លោកនិយាយថា វាមើលទៅតានតឹងខ្លាំង។

លោក Biden បាននិយាយថា លោកព្រួយបារម្ភខ្លាំង អំពីការកើតឡើងអំពើហិង្សានៅក្នុងទីក្រុងហ្សេរុយសាឡឹមភាគខាងកើត ដែលដាក់បញ្ចូលជាឧបសម្ព័ន្ធដោយអ៊ីស្រាអែល ខណៈខែបុណ្យរ៉ាម៉ាដាន ខិតជិត មកដល់។ 

ស្លាបប្រដាប់អាវុធរបស់ក្រុមហាម៉ាស កាលពីថ្ងៃសុក្របានជំរុញឱ្យអ្នកគាំទ្រប្រមូលផ្តុំដើរឆ្ពោះទៅកាន់បរិវេណវិហារអ៊ីស្លាម Al-Aqsa នៅទីក្រុងហ្សេរុយសាឡឹមភាគខាងកើត ជាចំណុចក្តៅសម្រាប់អំពើហិង្សា ក្នុងអំឡុងខែបុណ្យរ៉ាម៉ាដាន កាលពីបណ្តាឆ្នាំកន្លងទៅ។

សង្គ្រាមរវាងអ៊ីស្រាអែល-ក្រុមហាម៉ាស ត្រូវបានបង្កឡើងដោយការវាយប្រហារមិនធ្លាប់មានពីមុនមករបស់ក្រុមសកម្មប្រយុទ្ធប៉ាឡេស្ទីន លើភាគខាងត្បូងប្រទេសអ៊ីស្រាអែល កាលពីថ្ងៃទី ៧ ខែតុលា។

ដោយវិបត្តិមនុស្សធម៌នៅតំបន់ហ្កាហ្សា កាន់តែរីកធំធ្ងន់ធ្ងរឡើង លោក Biden បានបង្ហាញភាពលែងអត់ធ្មត់ ជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu។ ការខកចិត្តរបស់លោកជាមួយ លោក Netanyahu ត្រូវបានលាតត្រដាង បន្ទាប់ពីសុន្ទរកថាអំពីរដ្ឋសហភាពរបស់លោក។