ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្រ បាន​អំពាវនាវ​ឱ្យ​បញ្ឈប់​ជា​បន្ទាន់​នូវ​អរិភាព​នៅ​ក្នុងប្រទេសស៊ូដង់ ដោយធ្វើឲ្យប្រទេសចិនរំលឹកដល់ក្រុមប្រឹក្សា កុំឱ្យភ្លេច​ពី​សង្គ្រាម​អ៊ីស្រាអែល និង​ក្រុមហាម៉ាស នៅតំបន់ហ្កាហ្សា។ ប្រទេសរុស្ស៊ី បានអនុប្បវាទ ខណៈ​សមាជិក​ក្រុម​ប្រឹក្សា​ចំនួន ១៤រូប ដែលនៅសល់ បានបោះឆ្នោតគាំទ្រ​សេចក្តី​សម្រេច​ពង្រាង​ដោយ​ចក្រ​ភព​អង់គ្លេស ដែលបា​ន​អំពាវ​នាវ​ឱ្យ​បញ្ឈប់​ជា​បន្ទាន់​នូវ​អរិភាព​ក្នុង​អំឡុង​ពេល​ខែ​តម​អាហារ​របស់​ពលរ​ដ្ឋមូស្លីមនៃ ខែបុណ្យរ៉ាម៉ាដាន ដែលចាប់ផ្តើមនៅដើមសប្តាហ៍ក្រោយនេះ។ សង្គ្រាមបានផ្ទុះឡើងនៅប្រទេសស៊ូដង់ នៅថ្ងៃទី ១៥ ខែមេសា ឆ្នាំ ២០២៣ រវាងកងទ័ពស៊ូដង់ និង​កងកម្លាំងគាំទ្ររហ័ស (RSF)។

អង្គការសហប្រជាជាតិនិយាយថា មនុស្សជិត ២៥ លាន​នាក់​ ជាចំនួនប្រជាជនពាក់កណ្តាលរបស់ប្រទេសស៊ូដង់ ត្រូវការជំនួយ ហើយប្រហែល ៨ លាន​នាក់​បាន​ភៀស​ខ្លួនចេញពីលំនៅឋានរបស់ពួកគេ ខណៈភាពអត់ឃ្លានកំពុងកើនឡើង។ ទីក្រុងវ៉ាស៊ីនតោន និយាយថា ភាគីជម្លោះបានប្រព្រឹត្តឧក្រិដ្ឋកម្មសង្គ្រាម។ យោង​តាម​របាយ​ការណ៍​អ្នក​ឃ្លាំមើលការដាក់ទណ្ឌកម្មរបស់អង្គការសហប្រជាជាតិ បានឲ្យដឹងថា មនុស្សចន្លោះពី ១០.០០០នាក់ ទៅ ១៥.០០០នាក់ ត្រូវបានសម្លាប់នៅក្នុងទីក្រុងតែមួយនៃតំបន់ West Darfur របស់​ប្រទេសស៊ូដង់កាលពីឆ្នាំមុនក្នុងអំពើហិង្សាជនជាតិភាគតិច ធ្វើឡើង​ដោយ​កង​កម្លាំង​គាំទ្រ​រហ័ស(RSF) និងកងជីវពលសម្ព័ន្ធមិត្តអារ៉ាប់។

លោក Dai Bing អគ្គរដ្ឋទូត​រង​របស់​អង្គការ​សហ​ប្រជាជាតិ​របស់​ប្រទេសចិន បាននិយាយទៅកាន់ក្រុមប្រឹក្សាថា ខណៈអនុម័ត​សេចក្តី​សម្រេច​ស្តីពី​បទ​ឈប់​បាញ់ក្នុងអំឡុងខែបុណ្យរ៉ាម៉ាដាន ក្នុងប្រទេសស៊ូដង់ ក្រុមប្រឹក្សាសន្តិសុខ មិនត្រូវ​ភ្លេច​ថា​ប្រជាជន​នៅតំបន់ហ្កាហ្សា នៅតែរងទុក្ខវេទនាក្រោមការទម្លាក់គ្រាប់បែក។ «សហគមន៍អន្តរជាតិ ត្រូវតែជំរុញឱ្យមានបទឈប់បាញ់ជាបន្ទាន់»។ សហរដ្ឋអាមេរិក ពុំ​បាន​ឆ្លើយ​តប​នៅក្នុងក្រុមប្រឹក្សា ចំពោះការលើកឡើងរបស់រុស្ស៊ីនិងចិន លើ​បញ្ហា​តំបន់​ហ្កាហ្សា​នោះ​ទេ​។ បច្ចុប្បន្នសហរដ្ឋអាមេរិក កំពុងចរចាលើសេចក្តីព្រាងសេចក្តីសម្រេច ដែលគាំទ្រ «បទ​ឈប់​​បាញ់​បន្ទាន់​រយៈពេលប្រហែលប្រាំមួយសប្តាហ៍នៅតំបន់ហ្កាហ្សា រួមជាមួយការ​ដោះលែង​ចំណាប់​ថ្នូរ​ទាំងអស់​៕