​គុន​ចម្រុះ​៖ អ្នកលេង​គុន​ចម្រុះ​ជើង​ខ្លាំង​កម្ពុជា ចាន់ រតនា បាន​បើកភ្លើង​ខៀវ​ស្វាគមន៍​ដោយ​ក្ដី​រីក​រាយ ចំពោះ​ការប្រកាស​ចង់​ជួប​លើស​ង្វៀន​លំដាប់​ពិភពលោក ONE Championship ពី​សំណាក់​កីឡាករ​ជើង​ខ្លាំង​ឥណ្ឌូនេស៊ី Eko Roni Saputra កាល​ពី​ពេល​ថ្មីៗ។​

​ការ​ឆ្លើយតប​របស់​ជើង​ខ្លាំង​គុន​ខ្មែរ​រូបនេះ បន្ទាប់ពី​កីឡាករ Eko Roni Saputra បាន​ប្រកាស​ចង់​ជួប និង​សាក​ថ្វីដៃ​ជាមួយ ចាន់ រតនា ពិសេស​ចង់​សងសឹក​ឲ្យ​មិត្ត​រួម​ជាតិ ២​រូបដែល​ធ្លាប់​បរាជ័យ​ក្រោម​ថ្វីដៃ​បុរស​វ័យ ៣៥​ឆ្នាំ​រូប​នេះ​កាលពី​ឆ្នាំ​២០១៨ និង​ឆ្នាំ​២០១៩ គឺ​កីឡាករ Rudy Agustian និង Abrou Fernandes។​ ​ចាន់ រតនា បាន​បញ្ជាក់​ថា ខ្លួន​រីករាយ​ក្នុង​ការ​ត្រៀម​ជួប Eko Roni ដ្បិត​គេច​ង់​សងសឹក​ឲ្យ​មិត្ត​រួម​ជាតិ។ ចំពោះ​សមត្ថភាព​របស់​កីឡាករ​ឥណ្ឌូនេស៊ី​រូប​នេះក៏​មិន​ចាញ់​កីឡាករ Rudy Agustian និង Abrou Fernandes ដែល​ខ្លួន​ធ្លាប់​យកឈ្នះ​លើស​ង្វៀន ONE ដែរ ប៉ុន្តែ រតនា រំពឹងថា នឹង​ធ្វើ​ឲ្យ​បាន​ល្អ​បំផុតដើម្បី​រក្សា​កំណត់ត្រា​មិន​ចាញ់​កីឡាករ​ឥណ្ឌូនេស៊ី។​ ​សូម​បញ្ជាក់​ថា កាលពី​សប្ដាហ៍​មុន អ្នកលេង​គុន​ចម្រុះ​ឥណ្ឌូនេស៊ី Eko Roni Saputra បាន​ប្រកាស​ចង់​ជួប ចាន់ រតនា ក្នុង​គោលបំណង​ធំ​បំផុត គឺ​ចង់​សងសឹក​ឲ្យ​មិត្ត​រួម​ជាតិ​របស់​ខ្លួន ដោយ​និយាយ​ត្រង់​ៗ​ថា រតនា ធ្លាប់​ផ្តួល​កីឡាករ​ឥណ្ឌូណេស៊ី​ច្រើន​នាក់​ហើយ ដូច្នេះ​កីឡាករ​កម្ពុជា​រូប​នេះ​នឹង​ក្លាយ​ជា​ដៃគូ​ដ៏​លំបាក​សម្រាប់​ខ្លួន​។

ម្យ៉ាង រតនា មាន​ជំនាញ​វាយ​ឈរ​ល្អ ហេតុនេះ​ខ្លួន​ពិតជា​ចង់​ជួប ហើយ​បើ​បាន​ជួប​មែន Eko Roni នឹង​លេង​ក្បាច់​ក្រោម ដើម្បី​ចង់​ដឹង​ថា តើ​រវាង​អ្នក​ជំនាញ​វាយឈរប៉ះ​អ្នក​ពូកែ​ក្បាច់​ក្រោម គួរ​ឲ្យ​ចាប់អារម្មណ៍​យ៉ាងណា​? ​បើ​ក្រឡេក​មក​ចាប់អារម្មណ៍​ប្រវត្តិ​លើស​ង្វៀន ONE រវាង​អ្នក​ទាំងពីរ​វិញ ចាន់ រតនា ហាក់​មានប្រៀប​លើ Eko Roni ដ្បិត​ធ្លាប់​ប្រកួត​លើស​ង្វៀន​លំដាប់​ពិភពលោក​នេះ ១០​ដង ឈ្នះ ៧ និង​ចាញ់ ៣ ខណៈ Eko Roni ធ្លាប់​ប្រកួត​បាន ៥​ដង ឈ្នះ ៤ និង​ចាញ់​ម្ដង ក្នុង​នោះ​គេ​ក៏​ធ្លាប់​យកឈ្នះ​កីឡាករ​កម្ពុជា ខុន ស៊ី​ចាន់ ត្រឹម​ទឹក​ទី​១ កាល​ពី​ដើម​ឆ្នាំ​២០២០ ផង​ដែរ៕

​អត្ថបទ៖ លី ឈុន​ឡា