ប្រជាជននៅក្នុងប្រទេសទួគី រាប់ពាន់នាក់បានចេញដង្ហែក្បួន ក្រោមសន្តិសុខដ៏តឹងរ៉ឹង ក្នុង​ទីក្រុង​អ៊ីស្តង់​ប៊ុល កាលពីថ្ងៃសុក្រ ដើម្បីប្រារព្ធទិវាសិទ្ធិនារីអន្តរជាតិ ខណៈ​ពួកគេ​បាន​សម្តែង​ការ​ព្រួយ​បារម្ភ​អំពី​ការ​សម្លាប់ស្ត្រី និងធ្វើឲ្យមានការយកចិត្តទុកដាក់ចំពោះការលំបាកផ្នែកសេដ្ឋកិច្ច និងសង្គមដែលពួកគេប្រឈមមុខ។

ក្រោមវត្តមាននគរបាលយ៉ាងច្រើន ស្ត្រីបានដើរដង្ហែក្បួននៅតាមដងផ្លូវក្បែរទីលាន Taksim ដោយ​ស្រែក​ពាក្យផ្សេងៗ និងមានកាន់ស្លាក និងបដា។ អ្នកតវ៉ា នាង Leyla Can បាននិយាយថា នាង​កំ​ពុងចូលរួមការតវ៉ា ដើម្បីអំពាវនាវឱ្យពិភពលោកមានភាពស្មើគ្នា ហើយនាងជឿថា រដ្ឋាភិបាល​កំពុង ព្យាយាមបង្កើតគំរូស្ត្រី ដែលសាកសមទៅនឹងរបបរបស់ខ្លួន។ នាង Acelya Ucar ជាអ្នកតវ៉ាម្នាក់ទៀត បាននិយាយថា វាពិតជាពិបាកសម្រាប់ស្ត្រីក្នុងការដើរធ្វើបាតុកម្មតាមផ្លូវនៅពេលយប់ ហើយ​វា​មិន​ត្រូវ​បាន​គេ​ធ្វើ​ឲ្យ​បាន​គ្រប់​គ្រាន់ ដើម្បីប្រយុទ្ធប្រឆាំងអំពើហិង្សាលើស្ត្រីនោះទេ។ ជាមួយគ្នានេះ មនុស្សរាប់​ពាន់​នាក់​ក៏​បាន​ដើរដង្ហែក្បួននៅទីក្រុងបាសេឡូណា តវ៉ាប្រឆាំងនឹងវិសមភាពយេនឌ័រ និងការតស៊ូ ដើម្បី​សិទ្ធិ​អ្នកស្រឡាញ់ភេទដូចគ្នា និងអ្នករកស៊ីផ្លូវភេទ។ ក្រុមអ្នកតវ៉ាបានកាន់ស្លាកបដាពិល ទង់​ពណ៌ស្វាយ និងភ្លើង នៅពេលដែលពួកគេដើរកាត់កណ្តាលទីក្រុងប្រវត្តិសាស្ត្រ។ នៅទីក្រុងម៉ាឌ្រីដ មនុស្សរាប់ម៉ឺននាក់ បានមកប្រមូលផ្តុំគ្នានៅក្នុងការហែក្បួន ដែលឆ្លុះ​បញ្ចាំង​ពី​មនោគម​វិជ្ជាខុសគ្នា នៅក្នុងចលនាស្ត្រី នៅក្នុងរដ្ឋធានីប្រទេសអេស្ប៉ាញ។

គណៈ​ប្រតិភូរដ្ឋាភិបាលទីក្រុងម៉ាឌ្រីដ បាននិយាយថា មនុស្ស ៣០.000 នាក់ បាន​ចូល​រួម​ក្នុង​ការ​ហែ​ក្បួន ដែលរៀបចំដោយចលនាស្ត្រី M8 របស់ទីក្រុងម៉ាឌ្រីដ ហើយមនុស្ស ៤.០០០ នាក់ បាន​ចូល​រួមក្នុងការប្រឆាំងការកំណត់អត្តសញ្ញាណយេនឌ័រ ដែលអំពា​វនាវ​ឱ្យ​លុបបំបាត់​ពេស្យាចារ​ផង​ដែរ​។ ទន្ទឹមនឹងនេះ មនុស្សប្រមាណ៤.០០០នាក់ បានប្រារព្ធទិវា​សិទ្ធិនារី​អន្តរជាតិ​នៅ​ក្នុង​ជួប​ជុំ​មួយ​ក្នុង​ទីក្រុងប៊ែកឡាំង កាលពីថ្ងៃសុក្រ ទី៨ ខែមីនា ជាថ្ងៃឈប់សម្រាកសាធារណៈ នៅក្នុង​រដ្ឋធានី ប្រទេសអាល្លឺម៉ង់។ បាតុកម្ម ត្រូវបានរៀបចំឡើងដោយក្រុមស្ត្រី និងសហជីព ហើយ​អ្នក​ចូល​រួម ទាមទារសិទ្ធិស្មើគ្នាសម្រាប់ស្ត្រី ដោយចាត់ទុកស្ថានភាពបច្ចុប្បន្នថា «មិនអាច​ទទួល​យកបាន​»៕