ដោយមានការគាំទ្រពីសំណាក់ ក្រសួងអប់រំ យុវជន និងកីឡា នៅថ្ងៃទី០៥ ដល់ថ្ងៃទី០៧ ខែមីនា ឆ្នាំ​២០២៤ កន្លងទៅថ្មីៗនេះ សមាគមនិស្សិតកម្ពុជាប្រចាំសាធារណរដ្ឋប្រជាមានិតចិន (ACSC) និង​សមាគមទំនាក់ទំនងយុវជនកម្ពុជាចិន បានចុះធ្វើសិក្ខាសាលា ស្តីពីការតម្រង់ទិស និង​ផ្សព្វ​ផ្សាយ​ស្នើ​សុំ​អាហារូបករណ៍ទៅបន្តការសិក្សានៅប្រទេសចិន ដល់សិស្សានុសិស្ស ថ្នាក់ទី១០ ទី១១ និងទី១២ ចំនួន៤វិទ្យាល័យ ក្នុងស្រុកចំនួន៤ នៃខេត្តស្វាយរៀង ដែលមាន​សិស្សានុសិស្ស​ចូលរួម​សរុបចំនួនប្រមាណ ៤,០០០នាក់។ វិទ្យាល័យទាំងនោះ មានដូចជា ទី១ វិទ្យាល័យ ហ៊ុនសែន កំពង់រោទិ៍ ស្ថិតនៅស្រុកកំពង់រោទិ៍ ទី ២ វិទ្យាល័យ ហ៊ុនសែន ស្វាយជ្រំ ស្ថិត​នៅស្រុ​ក​ស្វាយ​ជ្រុំ ទី៣ វិទ្យាល័យ ស្វាយរៀង ស្ថិតនៅក្រុងស្វាយរៀង ទី៤ វិទ្យាល័យ ហ៊ុនសែន ប្រសូតិ ស្ថិតនៅស្រុកស្វាយទាប ព្រឹកថ្ងៃទី០៧ ខែមីនា ឆ្នាំ២០២៤។

សិក្ខាសាសានេះ មានការចូលរួមដោយ លោក អ៊ុំ វុទ្ធទី ប្រធានក្រុមប្រឹក្សាភិបាល ACSC និង​ជា​ប្រធាន​សមាគម CCYA ព្រមទាំងជាជំនួយការសម្តេចវិបុលសេនាភក្តី សាយ ឈុំ , លោក ញិល សូវៀត អនុប្រធានក្រុមប្រឹក្សាភិបាល ACSC និងជាអនុប្រធានសមាគម CCYA ព្រមទាំង​ជាជំនួយ​ការ​សម្តេចវិបុលសេនាភក្តី សាយ ឈុំ , លោកស្រី លី ស៊ានលីន (LI XUELIN) អនុ​ប្រធាន​សមាគម CCYA រួមទាំងវាគ្មិនជាបេក្ខជនជ័យលាភីអាហារូបករណ៍CSC ឆ្នាំ២០២៤ និង​ជា​អតីតសិស្សនិទ្ទេសA រួមមាន កញ្ញា តាំង មុយលី (ឆ្នាំ២០២៣) និងលោក សុង គីមទៀង (ឆ្នាំ២០២២) ព្រមទាំងមានការចូលរួមពីតំណាងក្រសួងអប់រំ យុវជន និងកីឡា និងលោក​នាយក​វិទ្យាល័យទាំង៤ ផងដែរ។

លោក អ៊ុំ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិត ACSC បាន​លើក​ទឹក​ចិត្ត​ដល់​សិស្សានុសិស្ស ត្រូវខិតខំរៀនភាសាបរទេសឲ្យបានល្អ អាចប្រើប្រាស់ជាផ្លូវការបាន ជា​ពិសេស​ភាសាចិន និងភាសាអង់គ្លេស ជាស្ពានដ៏រឹងមាំ ដែលអាចចម្លងប្អូនៗ ទៅកាន់​ពិភព​លោក​ដ៏​ធំធេង​។ ប្រធានក្រុមប្រឹក្សាភិបាលសមាគមនិស្សិត ACSC បានអំពាវដល់សិស្សានុសិស្ស ត្រូវ​ស្វែង​រក​ប្រភពព័ត៌មានច្បាស់លាស់ ត្រឹមត្រូវ ពីព្រោះកន្លងមក មាននិស្សិតមួយចំនួនរងគ្រោះ រង​ការ​ឆបោក​ពីក្រុមហ៊ុនសេវាកម្ម ឬបុគ្គលមួយចំនួន ក្នុងការរត់ការ​រៀបចំ​ឯកសារ​អាហា​រូបករណ៍​ទៅ​សិក្សា​នៅ​ប្រទេសចិន។

លោក អ៊ុំ វុទ្ធទី បានបន្តទៀតថា សមាគមនិស្សិត នៅតែបន្តគោរព​ដឹងគុណ​អតីត​នាយករដ្ឋ​មន្ត្រី​កម្ពុជា​ គឺសម្តេចតេជោ ហ៊ុន សែន ,សម្តេចវិបុលសេនាភក្តី សាយ ឈុំ ប្រធានព្រឹទ្ធសភាកម្ពុជា, សម្តេច​មហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងសភាពាណិជ្ជកម្មកម្ពុជា ព្រម​ទាំង​ថ្នាក់​ដឹក​នាំផ្សេងៗទៀត ចំពោះការគាំទ្រ និងឧបត្ថម្ភ ទ្រទ្រង់​សកម្មភាព​សមាគម​ចាប់​តាំង​ពី​ថ្ងៃ​បង្កើត​សមាគមនិស្សិត (១១ ឧសភា ២០១៧) រហូតមកបច្ចុប្បន្ន សមាគមបានរីកចម្រើន រឹងមាំ ហើយ​បាន និងបន្តឈរជើងធ្វើសកម្មភាពបានជាច្រើន ដើម្បីជាប្រយោជន៍ដល់យុវជន និង​សង្គម​ជាតិ៕