និស្សិតប្រទេសក្រិក បានគប់គ្រាប់បែកសាំងដាក់លើនគរបាល ដែល​នគរបាល​បាន​ឆ្លើយតប​វិញ​ដោយ​ឧស្ម័នប​ង្ហៀរទឹកភ្នែក នៅកណ្តាលក្រុងអាតែន កាលពីថ្ងៃសុក្រ ប៉ុន្មានម៉ោងមុន​ពេល​សភា​ត្រូវ​បាន​គេរំពឹងថា នឹងអនុម័តច្បាប់ ដែលនឹងអនុញ្ញាតឱ្យសាកលវិទ្យាល័យឯកជនបរទេស បង្កើត​សាខានៅក្នុងប្រទេស។

និស្សិតរាប់ពាន់នាក់ បានធ្វើការតវ៉ាទ្រង់ទ្រាយធំដោយសន្តិវិធី រយៈពេល​ជា​ច្រើន​សប្តាហ៍​ប្រឆាំង​កំណែ​ទម្រង់ដែលពួកគេនិយាយថា នឹងធ្វើឱ្យធ្លាក់តម្លៃសញ្ញាបត្រពីសាកលវិទ្យាល័យរដ្ឋ ប៉ុន្តែ​កំហឹង​បាន​ផ្ទុះឡើង នៅពេលដែលនាយករដ្ឋមន្ត្រី លោក គីរីយ៉ាកូស មីតសូតាគិស (Kyriakos Mitsotakis) បានជំរុញឱ្យសមាជិកសភាបោះឆ្នោតសេចក្តីស្នើច្បាប់នេះ។

លោក Mitsotakis ដែលបានឈ្នះអាណត្តិទីពីរកាលពីខែមិថុនាឆ្នាំមុន បាននិយាយថា ច្បាប់​នេះនឹ​​ងជួយផ្លាស់ប្តូរការចាកចេញរបស់និស្សិតប្រទេសក្រិករាប់ម៉ឺននាក់ ទៅកាន់​សាកល​វិទ្យាល័យ​នៅ​បរទេស ខណៈសេដ្ឋកិច្ចនៅបន្តងើបឡើងវិញពីវិបត្តិហិរញ្ញវត្ថុ រយៈ​ពេល​មួយ​ទសវត្សរ៍​មកនេះ។ លោកបានបន្តថា សេចក្តីស្នើច្បាប់នេះ ក៏នឹងជួយគាំទ្រប្រទេសក្រិកជាមួយសហភាពអឺរ៉ុប និង​ជំរុញ​ការ​ប្រកួតប្រជែងក្នុងវិស័យអប់រំថ្នាក់ឧត្តមសិក្សា។ សេចក្តីស្នើ​ច្បាប់នេះ ទំនងជាត្រូវបានអនុម័ត ខណៈរដ្ឋាភិបាលអភិរក្សនិយម គ្រប់គ្រង​សមាជិក​សភា​ចំ​នួន ១៥៨ រូប នៅក្នុងសភាដែលមាន ៣០០ អាសនៈ៕