បន្ទាយមានជ័យ​ ៖​ អាវុធហត្ថនារីបានខិតខំយ៉ាងសស្រាក់សស្រាំ​ តស៊ូការពារជាតិមាតុភូមិ​ ក្នុង​បុព្វហេតុ​ការពារប្រទេសជាតិ​ រហូតទទួលបាននូវសុខសន្តិភាព។ ជាពិសេស​ក្នុង​ដំណាក់​កាល​នៃ​ការ​រីករាលដាល នៃជំងឺកូវីដ-១៩​ អាវុធហត្ថនារី​ បានចូលរួមចំណែក​យ៉ាងសកម្ម​ដោយ​មិន​ខ្លាច​នឿយ​ហត់​ ក្នុងការប្រយុទ្ធប្រឆាំងជាមួយនឹងជំងឺកូវីដ-១៩ ​រហូត​ទទួល​បាន​ជោគជ័យ។

នេះបើតាមការលើកឡើងរបស់លោកឧត្តមសេនីយ៍ត្រី បោន ប៊ិន មេបញ្ជាការ​កងរាជ​អាវុធ​ហត្ថ​ខេត្ត​បន្ទាយមានជ័យ​ ក្នុងពិធីអបអរសាទរខួបទី១១៣ ទិវាអន្តរជាតិនារី ៨មីនា ឆ្នាំ២០២៤​ ក្រោម​ប្រធានបទ​ "​ ស្ត្រី និងក្មេងស្រី ក្នុងបរិវត្តកម្មឌីជីថល"​ នៅបញ្ជាការដ្ឋាន​កងរាជ​អាវុធ​ហត្ថ​ខេត្ត​បន្ទាយមានជ័យ​ នាថ្ងៃទី០៩​ ខែមីនា​ ឆ្នាំ២០២៤។

ជាមួយគ្នានោះលោក​ឧត្តមសេនីយ៍ត្រី​ បោន​ ប៊ិន​ ក៏បាន​បញ្ជាក់ថា​ ក្រោមការដឹកនាំ​របស់​សម្ដេច​មហា​បវរ​ធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាពណាចក្រកម្ពុជា បានកំណត់​ការ​លើក​កម្ពស់​សម​ភាព​យេនឌ័រ និងបង្កើនភាពអង់អាចរបស់ស្រ្ដី និងក្មេងស្រីនៅគ្រប់វិស័យ ជាអាទិភាព​ក្នុង​របៀប​វារៈគោលនយោបាយ និងយុទ្ធសាស្រ្ដបញ្ចកោណ ដំណាក់កាលទី១ តាមរយៈ​ការ​ពង្រឹង​ភាព​ជាពលរដ្ឋ ក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និង​បរិយាបន្ន ដែលក្នុងនោះស្រ្ដីគឺជាស្នូល។ ព្រមជាមួយគ្នានោះ​ រាជរដ្ឋភិបាលបច្ចុប្បន្ន​ បន្ត​លើក​កម្ពស់​សម​ភាពយេនឌ័រ និងបង្កើនភាពអង់អាចដល់ស្រ្ដីនៅក្នុងវិស័យសេដ្ឋកិច្ច អប់រំសុខភាព និង​ក្នុង​តួនាទី​ជាអ្នកដឹកនាំ ដើម្បីទាញយកអត្ថប្រយោជន៍ពីយេនឌ័រ បង្កលក្ខណៈ​អំណោយ​ផល​ដល់​ស្រ្ដី​ក្នុង​កា​រប្រើប្រាស់សិទ្ធិ​លើការសម្រេចចិត្តអំពីគ្រួសារ និងចំនួនកូន កាត់បន្ថយ​ភាពងាយ​រង​គ្រោះ​ដោយ​អំពើហិង្សាទាក់ទងនឹងយេនឌ័រ​លើស្រ្ដី និងក្មេងស្រី ព្រម​ទាំង​ការ​លើក​កម្ពស់​ទំនាក់​ទំនង​អន្តរជំនាន់​៕​ អត្ថបទ​ រឿង​ ចន្ទ្រា