ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃសុក្រ ទី៨ ខែមីនា ថា រុស្ស៊ី នឹង​មិនត្រូវ​បាន​គេអញ្ជើញ​ឱ្យចូលរួម​ក្នុង​កិច្ច​ប្រជុំ​កំពូល​ស្តីពី​សន្តិភាព​លើក​ដំបូ​ង​នោះ​ទេ ដែលនឹងត្រូវធ្វើឡើងនៅក្នុងប្រទេសស្វីស។ បន្ទាប់ពីកិច្ចពិភាក្សាជាមួយប្រធានាធិបតី លោក Tayyip Erdogan នៅទីក្រុងអ៊ីស្តង់ប៊ុល លោក Zelenskiy បាននិយាយថា អ្នក​តំណាង​រុស្ស៊ី អាចត្រូវបានអញ្ជើញឱ្យចូលរួមក្នុងកិច្ចប្រជុំលើកក្រោយ បន្ទាប់ពីផែនទី​បង្ហា​ញ​ផ្លូវ​សម្រាប់​សន្តិភាព​នឹងត្រូវបានពិភាក្សា និងការព្រមព្រៀងអាស្រ័យលើសម្ព័ន្ធមិត្តរបស់អ៊ុយក្រែន នៅក្នុងកិច្ចប្រជុំនៅប្រទេសស្វីស។

ភាគីទាំងពីរបាននិយាយថា លោក Erdogan បាន​ទទួល​លោក Zelenskiy សម្រាប់កិច្ចពិភាក្សា ស្តីពីដំណើរនៃសង្រ្គាមអ៊ុយក្រែន-រុស្ស៊ី កិច្ចព្រម​ព្រៀង​គ្រាប់​ធញ្ញជាតិ​នៅសមុទ្រខ្មៅដែលត្រូវបានលុបចោល និងការបង្កើន​កិច្ច​សហប្រតិបត្តិការ​ឧស្សាហកម្ម​ការពារជាតិ។ ប្រធានាធិបតីទួរគី បាននិយាយថា កិច្ចប្រជុំបានចាប់ផ្តើម បន្ទាប់​ពី​លោក Zelenskiy បានទៅពិនិត្យមើលទីតាំងផលិតនាវាមួយកន្លែង នៅជិតទីក្រុងអ៊ីស្តង់ប៊ុល ដើម្បី​ពិនិត្យការងារនាវាចម្បាំងធុនតូចពីរគ្រឿង ដែលកំពុង​ត្រូវ​បាន​ផលិត សម្រាប់​កង​ទ័ព​ជើង​ទឹក​អ៊ុយក្រែន។ ទួរគីជាសមាជិករបស់សម្ព័ន្ធយោធាណាតូ ហើយបានគាំទ្រ​បូរណភាព​ទឹក​ដី​របស់​អ៊ុយក្រែន ប៉ុន្តែក៏រក្សាទំនាក់ទំនងស្និទ្ធស្នាលជាមួយរុស្ស៊ី ហើយជារឿយៗ បាននិយាយ​ជាមួយ​ភាគី​ទាំង​ពីរ​ក្នុង​ជម្លោះ ជាពិសេសក្នុងនាមជាអ្នកជួយក្នុងកិច្ចព្រមព្រៀងនៅសមុទ្រខ្មៅ ដែល​បាន​លុប​ចោល​ការ​រារាំងធ្វើឡើងដោយរុស្ស៊ី ចំពោះការនាំចេញគ្រាប់ធញ្ញជាតិរបស់អ៊ុយក្រែន។

ការិយាល័យរបស់ លោក Zelenskiy បាននិយាយថា របៀបវារៈ រួមមានរូបមន្តសន្តិភាព ដែល​មាន​បំណង​បញ្ចប់សង្គ្រាមជាមួយរុស្ស៊ី កិច្ចសហប្រតិបត្តិការឧស្សាហកម្មការពារជាតិទ្វេភាគី និង​ការ​ដោះលែង​អ្នកទោសសង្គ្រាមអ៊ុយក្រែន ដែលឃុំខ្លួនដោយទីក្រុងមូស្គូ៕