មនុស្សជិត ១ពាន់នាក់ បាននាំគ្នាចូលរួមរត់ប្រណាំងនៅវិថីសាយ ភូថង ក្នុងស្រុកបូទុមសាគរ ខេត្តកោះកុង ដើម្បីប្រមូលមូលនិធិជួ​យអភិវឌ្ឍន៍សហគមន៍តំបន់ការពារធម្មជាតិពាមក្រសោប និង​អបអរសាទរទិវានារីអន្តរជាតិ ៨មីនា ឆ្នាំ២០២៤។

ប្រជាពលរដ្ឋមកពីគ្រប់ទិសទីបានប្រមូលផ្តុំរត់ប្រណាំងរយៈចម្ងាយ ៨គីឡូម៉ែត្រចាប់ពីភូមិជីត្រេះ ឃុំអណ្តូងទឹកដល់រង្វង់មូលវិថី សាយ ភូថង ក្រោមការរៀបចំរបស់រដ្ឋបាលខេត្តកោះកុង អាជ្ញាធរ​សមត្ថកិច្ច​ស្រុក​បូទូមសាគរ និងសហការជាមួយវិស័យឯកជន។

លោកជំទាវ មិថុនា ភូថង អភិបាលខេត្តកោះកុង បានឱ្យដឹងនៅថ្ងៃទី៩ ខែមីនា ឆ្នាំ២០២៤ថា ការ​រត់​ប្រណាំង​មានបុរសស្រ្តីនេះ ធ្វើឡើងដើម្បីអបអរសាទរទិវាអន្តរជាតិនារី ៨មីនា ផង និង​ប្រមូល​មូលនីធិជួយអភិវឌ្ឍន៍សហគមន៍តំបន់ការពារធម្មជាតិពាមក្រសោបផង។ លោកជំទាវ មិថុនា ភូថង អះអាងថា ស្រ្តីក្នុងជួរមន្រ្តីរាជការ និងវិស័យឯក​ជន​មាន​ឱកាស​ច្រើន ហើយ​​ក្រៅ​តែពីមា​ន​ចំណេះ​ដឹង សមត្ថភាព និងចេះប្រើប្រាស់បច្ចេកវិទ្យា គឺត្រូវមានសុខភាពល្អ។

ដោយឡែកសម្រាប់តំណាងអ្នកដែលរត់ប្រណាំងជាប់ចំណាត់ថ្នាក់លេខ១ រហូតដល់៥ លើក​ឡើង​ថា កម្មវិធីរត់ប្រណាំងនេះ ពិតជារៀបចំមានសណ្តាប់ធ្នាប់សន្តិសុខល្អប្រសើរ។ កីឡារត់​ប្រណាំង​ពិត​ជាផ្តល់នូវអត្ថប្រយោជន៍ជាច្រើនជួយឱ្យសុខភាពល្អ ​ដូច្នេះពួក​គេច​ង់​ឱ្យ​ពលរដ្ឋ​គ្រប់​រូប​ចូល​រួមលេងកីឡាឱ្យបានច្រើន ចៀសវាងទៅប្រព្រឹត្តអំពើអបាយមុខ ឬ​ប្រើប្រា​ស់​គ្រឿង​ញៀន​ដែល​សង្គមមិនផ្តល់តម្លៃអោយ។

គួរជម្រាបថា នេះជាលើកដំបូងហើយដែលរដ្ឋបាលខេត្តបានរៀបចំឡើងសម្រាប់ពលរដ្ឋ ព្រម​ទាំង​អ្នក​ទេសចរ​គ្រប់ស្រទាប់វណ្ណៈមកពីគ្រប់តំបន់ចូលរួមយ៉ាងសប្បាយរីករាយ មានសុខភាពល្អ ក៏​ដូច​ជា​ផ្សព្វ​ផ្សាយពីសក្តានុពលវិស័យទេសចរណ៍ផងដែរ៕ អត្ថបទ៖ ឈឹម មករា