ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល នៃរដ្ឋបាលរាជធានីភ្នំពេញ ថ្លែង​ប្រាប់​BTV ព័ត៌មាន នាថ្ងៃទី០៩ ខែមីនា ឆ្នាំ២០២៤នេះថា សង្កាត់ចំនួន៩១ ក្នុងចំណោមសង្កាត់១០៥ នៃ​រដ្ឋបាលខណ្ឌទាំង១៤ ក្នុងមូលដ្ឋានរាជធានីភ្នំពេញ គឺមន្ត្រីមនី្ទរសុខាភិបាលរាជធានីភ្នំពេញ សហការ​ជាមួយកងទ័ពអង្គភាព «ង៧០» បានចុះបាញ់ថ្នាំសម្លាប់មូសរួចរាល់។

ឯកឧត្តមវេជ្ជបណ្ឌិត ងី មានហេង បានបន្តថា សកម្មភាពខាងលើនេះ គឺឯកឧត្តម ឃួង ស្រេង អភិបាល​រាជធានីភ្នំពេញបានណែនាំ មន្ទីរសុខាភិបាល និងការិយាល័យ​សុខាភិបាល​ស្រុក​ប្រតិបត្តិ​ទាំង​៧ សហការជាមួយកងទ័ពអង្គភាព «ង៧០» និងរដ្ឋបាលខណ្ឌទាំង១៤ បាន​ចុះ​បាញ់​ថ្នាំ​សម្លាប់​មូស នៅតាមសង្កាត់ទាំង១០៥ ក្នុងភូមិសាស្ត្ររាជធានីភ្នំពេញ ចាប់ពីថ្ងៃទី២៣ ខែកុម្ភៈ ២០២៤ ដល់ថ្ងៃទី១៣ ខែមីនា ឆ្នាំ២០២៤។ ដោយឡែកនៅព្រលប់ថ្ងៃទី០៨ ខែមីនា ឆ្នាំ២០២៤ ក្រុម​ការងារបានចុះបាញ់ថ្នាំសម្លាប់មូស នៅសង្កាត់មនោរម្យ វាលវង់ អូរឬស្សីទី១ ទី២ និងទី៣ និង​ទួល​ទំពូងទី១។ គិតត្រឹមយប់ថ្ងៃទី០៨ ខែមីនា ឆ្នាំ២០២៤ដដែរនេះ ក្រុមការងារ​បាន​បាញ់​ថ្នាំ​នៅតា​មសង្តាត់ចំនួន៩១សង្កាត់ ដែលស្តិតនៅក្នុងខណ្ឌចំនួន១៣។   យើងបានបញ្ចប់ការបាញ់ថ្នាំសម្លាប់មូសនៅខណ្ឌចំនួន៩ រួមមានខណ្ឌសែនសុខ, ខណ្ឌ​ពោធិ៍​សែនជ័យ, ខណ្ឌមានជ័យ, ខណ្ឌដង្កោ, ខណ្ឌទួលគោក, ខណ្ឌព្រែកព្នៅ, ខណ្ឌបឹងកេងកង, ខណ្ឌដូនពេញ និងខណ្ឌជ្រោយចង្វារ។

ជាចុងក្រោយក្នុងនាមប្រធានមនី្ទរសុខាភិបាលរាជធានីភ្នំពេញ ឯកឧត្តម វេជ្ជបណ្ឌិត ងី មានហេង សូម​អំពាវនាវប្រជាពលរដ្ឋរស់នៅរាជធានីភ្នំពេញចូលរួមលុបបំបាត់ជម្រកមូសខ្លា។ ទឹកដក់​ជា​ជម្រក​មូសខ្លា (ទឹកដក់នៅក្នុងសំបកកង់ឡាន កង់ម៉ូតូ សំបកកំប៉ុង ដប វត្ថុដក់ទឹកភ្លៀង ជា​ជម្រក​មូសខ្លា)។ យើងរួមគ្នាលុបបំបាត់ជម្រកមូសខ្លា នៅក្នុងសហគមន៏របស់យើង ដើម្បី​រួម​ចំណែក​ទប់ស្កាត់ការចម្លងជំងឺគ្រុនឈាម។ មូសខ្លាជាភ្នាក់ងារចំលងជំងឺគ្រុនឈាម រីឯ​មូស​អង្កា​ម​មិន​មែន​ជាភ្នាក់ងារចម្លងជំងឺគ្រុនឈាមទេ។ គ្មានជម្រកមូសខ្លា គ្មានការចំលងជំងឺគ្រុនឈាម៕ អត្ថបទ រដ្ឋា