យោធាសហរដ្ឋអាមេរិក កាលថ្ងៃសុក្រ (ទី ៨ ខែមីនា) បាននិយាយថា ខ្លួន​បាន​ធ្វើ​ការ​វាយ​ប្រហារ​ការពារ ទល់នឹងមីស៊ីលប្រឆាំងនាវាចំនួន ២គ្រាប់ នៅ​តំបន់​ដែល​គ្រប់គ្រង​ដោយ​ក្រុម​ហ៊ួទី​របស់​ប្រទេស​យេម៉ែន។

តាមរយៈការបង្ហោះនៅលើបណ្ដាញសង្គម X ទីបញ្ជាការកណ្តាលរបស់សហរដ្ឋអាមេរិក បាន​ឲ្យ​ដឹង​ថា នៅម៉ោងប្រហែល ៣:៥៥នាទីរសៀល ម៉ោងក្នុងស្រុក ក្រុមភេរវករហ៊ួទី បានបាញ់​មីស៊ីល​ផ្លោង​ប្រឆាំង​នាវា ២គ្រាប់ចេញពីយេម៉ែន ចូលទៅក្នុងឈូងសមុទ្រ Aden តម្រង់​លើ​នាវា​ពាណិជ្ជ​កម្ម Propel Fortune ដែលមានទង់ជាតិរបស់ប្រទេសសិង្ហបុរីដែលគ្រប់គ្រង និង​ប្រតិបត្តិការ​លើ​នាវា​នេះ។​ ទីបញ្ជាការនេះបានបញ្ជាក់បន្ថែមថា មិនមានការរាយការណ៍ពីអ្នករងរបួស ឬការ​ខូច​ខាត​នោះ​ឡើយ​។

ដោយស្រង់សម្ដីពីមន្ត្រីឆ្មាំល្បាតឆ្នេរគាំទ្ររដ្ឋាភិបាល ក្នុងលក្ខខណ្ឌមិនចេញឈ្មោះ ទីភ្នាក់ងារ​សារ​ព័ត៌មាន Xinhua បានរាយការណ៍ថា នាវា​ដឹក​ទំនិញ​នេះ​ត្រូវ​បាន​កំណត់​គោល​ដៅដោយកា​រ​បាញ់​មីស៊ីល ខណៈដែលកំពុងធ្វើដំណើរបានចម្ងាយប្រហែល ៥០ម៉ាយល៍ក្នុងសមុទ្រ (៩២,៦​គីឡូម៉ែត្រ)​ ម្ដុំសមុទ្រ Aden។ តែយ៉ាងណាក្ដី ទីភ្នាក់ងារសារព័ត៌មាន Xinhua បានឲ្យ​ដឹង​បន្ថែម​ថា រហូតមកដល់ពេលនេះ ក្រុមហ៊ួទីមិនទាន់ចេញមុខអះអាងទទួលខុសត្រូវ ចំពោះការ​វាយ​ប្រហារ​នេះ​ទេ។

ការវាយប្រហារនេះត្រូវបានធ្វើឡើង បន្ទាប់ពីមានការ​វាយ​ប្រហារ​ដោយ​មីស៊ីល​ស្រដៀង​គ្នា​នេះ​ពីសំណាក់​ក្រុម​ហ៊ួទី កាលពីថ្ងៃទី៦ ខែមីនា សំដៅលើនាវាដឹក​ទំនិញ​ដែល​មាន​ទង់ជាតិ​ប្រទេស​បាបា​ដុស គឺនាវា «True Confidence» ដែលក្រុមនេះអះអាងថា ជាកម្មសិទ្ធិ​របស់​សហរដ្ឋអាមេរិ​ក៕