ប្រជាជនហៃទីនៅទីក្រុងព័រអូប្រាំង កំពុងជួបប្រទះនឹងផលវិបាកនៃវិបត្តិនយោបាយ និងសង្គម នៅក្នុងប្រទេសរបស់ពួកគេ។

កាលពីថ្ងៃសុក្រ (ទី៨ ខែមីនា) សកម្មជននយោបាយ លោក Myrthil Marcelin ត្រូវ​បាន​ស្វាគមន៍​ដោយក្តីរំភើបពីអ្នកជិតខាងរបស់លោក បន្ទាប់ពីលោកបានរត់ចេញពីពន្ធនាគារ កាល​ពី​ថ្ងៃអាទិត្យ (ទី៣ ខែមីនា)។ លោក Marcelin បាននិយាយថា លោកត្រូវបាន «ចាប់ពង្រាត់» ដោយ​រដ្ឋាភិបាលរបស់នាយករដ្ឋមន្ត្រី លោក Ariel Henry ។

នៅក្នុងសាលារៀនមួយ ដែលត្រូវ​បាន​ប្រែក្លាយ​ទៅជាជម្រក​សម្រាប់​អ្នកភៀស​ខ្លួន​ពី​ផ្ទះស​ម្បែង​របស់​ពួកគេដោយសារអំពើហិង្សារបស់ក្រុមអន្ធពាល គេឃើញថា ប្រជាជន​នៅទី​នោះ​បាន​ទទួល​ឧបករណ៍​អនាម័យពីអង្គការយូនីសេហ្វ។

គួរបញ្ជាក់ថា ប្រទេសហៃទីបានធ្លាក់ចូលទៅក្នុងភាពអាសន្ន កាលពីថ្ងៃអាទិត្យសប្តាហ៍មុន បន្ទាប់​ពី​មាន​ការប្រយុទ្ធគ្នាកាន់តែខ្លាំងឡើងៗ ដោយ​ក្រុមអន្ធពាល​ប្រដាប់​អាវុធ​បាន​ទម្លាយ​ពន្ធនាគារ​ឲ្យ​អ្នក​ទោស​រត់ចេញ ហើយមនុស្សប្រមាណជាង ១ម៉ឺននាក់ ត្រូវបានផ្លាស់ទីលំនៅ ខណៈ​ដែល​លោក​ Henry ស្ថិតនៅក្នុងប្រទេសកេនយ៉ា ស្វែងរកកិច្ចព្រមព្រៀងឲ្យមានកងកម្លាំងអន្តរជាតិ ដើម្បី​ទៅជួយប្រយុទ្ធប្រឆាំងនឹងក្រុមអន្ធពាលរបស់ប្រទេសហៃទី៕