ភ្នំពេញ៖ នៅព្រឹកថ្ងៃចន្ទទី១១ ខែមីនាឆ្នាំ ២០២៤នេះ កម្លាំងនគរបាល នៃអធិការរដ្ឋាននគរបាលខណ្ឌទួលគោក បានចុះផ្សព្វផ្សាយ អប់រំពីផលប៉ះពាល់ការប្រើប្រាស់គ្រឿងញៀន និងច្បាប់ចរាចរណ៍បញ្ចៀបការយល់ដឹងឱ្យបានកាន់តែទូលំទូលាយដល់សិក្សានុសិស្សនៃវិទ្យាល័យ និងអនុវិទ្យាល័យទាំង៧ នៅក្នុងមូលដ្ឋានខណ្ឌលគោក មានសិស្ស ចំនួន៩០៤៦នាក់ ក្នុងនោះស្រីមាន៤៥៦៤នាក់ ។
លោកវរសេនីយ៍ឯក ស៊ឹម ពិសិដ្ឋ អធិការនគរបាលខណ្ឌទួលគោក បានប្រាប់ BTVឲ្យដឹងថា ដោយអនុវត្ដន៍តាមការណែនាំរបស់ ឯកឧត្ដម ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ឲ្យបន្តការចុះផ្សព្វផ្សាយអប់រំ ជាប្រចាំដល់ទីតាំងសាលារៀន តាមបណ្តាគ្រឹះស្ថាន និងតាមភូមិ តាមតំបន់ស្មុគស្មាញ ដើម្បីបានផ្តល់ចំណេះដឹងជាច្រើនដល់សិស្សានុសិស្ស ខណៈវ័យរបស់ពួកគាត់ គឺងាយរងគ្រោះដោយឥទ្ធិពលគ្រឿងញៀនបំផុត ។ លោកបន្តថា លោកបានណែនាំឲ្យមន្រ្តីជំនាញក្រោមឱវាទ ទាំងជំនាញប្រឆាំងបទល្មើសគ្រឿងញៀន និងមន្រ្តីជំនាញផ្នែកចរាចរណ៍ ចុះផ្សព្វផ្សាយ ដើម្បីឲ្យសិស្សានុសិស្សយល់ដឹងពីការគោរពច្បាប់ចរាចរណ៍ផងដែរ ជៀសវាងបង្កគ្រោះថ្នាក់ចរាចរណ៍ និងអប់រំផ្សាព្វផ្សាយកុំអោយក្លាយខ្លួនជាក្មេងទំនើង។
លោកវរសេនីយ៍ឯក បានបញ្ជាក់ប្រាប់ថា នៅថ្ងៃនេះដែរ កម្លាំងជំនាញ បានចុះផ្សព្វផ្សាយ វិទ្យាល័យ និងអនុវិទ្យាល័យចំនួន៧ រួមមាន វិទ្យាល័យ ឥន្រ្ទទេវី, វិទ្យាល័យ ជាស៊ីមសន្ធរម៉ុក, វិទ្យាល័យ ជាស៊ីមសាមគ្គី, វិទ្យាល័យ ទឹកល្អក់, អនុវិទ្យាល័យ វត្ដនាគវ័ន្ដ,អនុវិទ្យាល័យ អូរបែកក្អម និង អនុវិទ្យាល័យ អនុវត្ដ។ សិស្សានុសិស្សសរុបទាំង០៧សាលា មានចំនួន៩០៤៦នាក់ក្នុងនោះស្រីមាន៤៥៦៤នាក់។
សូមបញ្ជាក់ បញ្ហាគ្រឿងញៀននេះ គឺជាការងារអាទិភាពចម្បងទី៤ ដែលរាជរដ្ឋាភិបាល អាណត្តិទី៧ កំពុងយកចិត្តទុកដាក់ក្នុងការប្រយុទ្ធប្រឆាំង ដូច្នេះហើយអាជ្ញាធរថ្នាក់ក្រោមជាតិ ក៏កំពុងខិតខំបន្តបង្ក្រាប និងដាក់ចេញនូវយន្តការចុះផ្សព្វផ្សាយជាបន្តបន្ទាប់ដល់ពលរដ្ឋ និងតាមសាលា និងវិទ្យាល័យទាំងអស់នៅក្នុងមូលដ្ឋាន ដើម្បីជាការតាសតឿន និងក្រើនរំលឹកដល់សិស្សានុសិស្សដែលជាទំពាំងស្នងឬស្សី ឱ្យជៀសឆ្ងាយដាច់ខាត និងត្រូវនិយាយថាទេចំពោះគ្រឿងញៀន៕ អត្ថបទ ៖ កុម្ភៈ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
