​បាល់ទាត់៖ ​នាយករដ្ឋមន្ត្រី​អង់គ្លេស​ លោក Boris Johnson កាលពី​ថ្ងៃ​ចន្ទ​បាន​ថ្កោលទោស​ការ​រំលោភ​បំពាន​ប្រកាន់​ជាតិ​សាសន៍ ​ទៅលើ​កីឡាករ​ក្រុមបាល់ទាត់​អង់គ្លេស​បន្ទាប់ពី​ពួកគេ​បាន​បរាជ័យ ​ក្នុង​ការ​ប្រកួត​វគ្គ​ផ្តាច់ព្រ័ត្រ European Championship។​

​​ប៉ូលីស​ក្រុង​ឡុង​ដ៍​បាន​បើក​ការស៊ើបអង្កេត ទៅលើ​ការវាយលុក​លើ​បណ្តាញ​សង្គម​ដែល​បាន​ផ្តោត​លើ​កីឡាករ​ស្បែក​ខ្មៅ​ចំនួន ៣​នាក់​រួមមាន Marcus Rashford, Jadon Sancho និង Bukayo Saka ដែល​ពួកគេ​ទាំង ៣​នាក់​ស៊ុត​បាល់ ១១​ម៉ែត្រ​កាត់សេចក្តី​មិន​ចូល​។​ ​លោក Boris Johnson បាន​និយាយ​ថា "​ចំពោះ​អ្នក​ដែល​បាន​ដឹកនាំ​ការ​រំលោភបំពាន ​រើសអើង​ជាតិ​សាសន៍​លើ​កីឡាករ​មួយ​ចំនួន​ ខ្ញុំនិយាយ​ថា ​វា​ជា​រឿង​គួរ​ឱ្យ​ខ្មាសអៀន​សំរាប់​អ្នក​ដែល​ធ្វើ​ទង្វើរ​បែបនេះ ​លើ​កីឡាករ​ដែល​ពួកគេ​សុទ្ធតែ​លេង​ដើម្បី​ជាតិ​។​ ​​ផ្ទាំង​គំនូរ​របស់ Marcus Rashford នៅ​លើ​ជញ្ជាំង​ហាង​កាហ្វេ​មួយ​នៅ​ភាគ​ខាងត្បូង​ទីក្រុង Manchester ក៏​ត្រូវ​បាន​គេ​ធ្វើ​ឱ្យ​ខូច​ទ្រង់​ទ្រាយ​ ​បន្ទាប់ពី​បរាជ័យ​របស់​អង់គ្លេស​នៅ​វគ្គ​ផ្តាច់ព្រ័ត្រ​។​

​​ការ​រំលោភ​បំពាន​ការរើសអើង​ជាតិ​សាសន៍​ដែល​ត្រូវ​បាន​ថ្កោលទោស​ថា​ជា​ទង្វើរ "​មិន​អាច​លើកលែង​បាន​" ស្របពេល​អ្នកចាត់ការ​អង់គ្លេស​ លោក Gareth Southgate បាន​អំពាវនាវ​ដល់​ក្រុមហ៊ុន​ប្រព័ន្ធ​ផ្សព្វផ្សាយ​សង្គម​ដូចជា Facebook រឺ Twitter ឱ្យធ្វើ​អ្វី​បន្ថែមទៀត​ក្នុង​ការតាមប្រមាញ់​ជន​ល្មើស​នៃ​ការរំលោភបំពាន​នេះ​។​ ​​សូមបញ្ជាក់ថា កីឡាករ​ទាំង ៣នាក់​នេះ​កន្លងមក​បានទទួល​ការកោតសរសើរ​ជាច្រើន ​តាមរយៈ​ទេពកោសល្យ​របស់​ពួកគេ ក៏ដូចជា​កាយវិការ​សប្បុរសធម៌​។​ ​​Marcus Rashford គឺជា​កីឡាករ​ម្នាក់​ដែល​ឈរ​មុខ​គេ ​នៃ​យុទ្ធនាការ​ប្រឆាំងនឹង​ភាពក្រីក្រ​របស់​កុមារ ​ក្រោម​ការជំរុញ​គាំទ្រ​ពី​រដ្ឋាភិបាល​អង់គ្លេស ដែល​រួមមាន​ការចុះ​ចែក​អាហារ​ដល់​កុមារ​ក្រខ្សត់​ អំឡុងពេល​រីក​រាលដាល​នៃ​មេរោគ Covid-19៕

​អត្ថបទ​៖​នាង សុភា​វុ​ធ