សម្តេចរដ្ឋសភាធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នាព្រឹកថ្ងៃទី១១ ខែ​មីនា​ឆ្នាំ២​០២៤នេះ បានដឹកនាំគណៈប្រតិភូជាន់ខ្ពស់រដ្ឋសភាកម្ពុជា ធ្វើមាតុភូមិ​និវត្តន៍​មក​ដល់​មាតុ​ប្រទេស​វិញ ប្រកបដោយសុវត្ថិភាព ក្រោមពីបាន​បំពេញ​ទស្សន​កិច្ច​ និង​ចូល​រួម​កិច្ច​ប្រជុំ​កំពូល​ប្រធាន​សភាជាស្រ្តី នៅសាធារណបារាំងចាប់ពីថ្ងៃទី២ដល់ថ្ងៃទី១០ ខែមីនាឆ្នាំ២០២៤ តប​តាម​ការអញ្ជើញរបស់ លោកជំទាវ យ៉ាអ៊ែល ប្រូន ពីវេ (Yaël Braun-Pivet) ប្រធាន​រដ្ឋសភា​បារាំង​។

វត្តមានប្រធានរដ្ឋសភាកម្ពុជាជាស្រ្តី ក្នុងកិច្ចប្រ​ជុំ​កំពូល​ប្រធាន​សភា​ជាស្រ្តីដែ​ល​មាន​វត្ត​មាន​ប្រធាន​សភា​ចំនួន ២៥ប្រទេស ក្នុងសកលោកចូលរួម ជាមោទកភាពរបស់កម្ពុជា និងជាឱកាស​រដ្ឋ​សភាកម្ពុជាលើកកម្ពស់វិស័យការទូតសភាជាមួយសភាជាមិត្ត ក្នុង​ការ​ជំរុ​ញយន្ត​ការ​សភា​នៅ​ក្នុង​ការ​ដោះស្រាយនិងស្វែងរកផលប្រយោជន៍ជូនពលរដ្ឋ ជាពិសេសស្រ្តី និងកុមារ។

ក្នុងដំណើរទស្សនកិច្ចនេះ សម្តេចរដ្ឋសភាធិបតី បានប្រើប្រាស់នូវទេពកោសល្យ បទពិសោធន៍ ការ​ទូត​សភាដ៏ទន់ភ្លន់ រស់រវើក ម៉ឹងម៉ាត់ ឈរគោលការណ៍ឯករាជ្យ អធិបតេយ្យ ដើម្បីទាញ​យក​ផល​ប្រយោជន៍ ជូនប្រទេសជាតិនិងប្រជាពលរដ្ឋ តាមរយៈវិស័យការទូតសភា រឹតចំណងមិត្តភាព កិច្ច​សហប្រតិបត្តិការកាន់តែសកម្មជាមួយសមភាគីបារំាង និងសភាបណ្តាប្រទេសនានា ដែល​មាន​វត្តមាននៅក្នុងកិច្ចប្រជុំកំពូលប្រធានសភាជាស្រ្តី ដូចជាការទាក់ទាញអ្នកវិនិយោគ អ្នក​ទេសចរ ស្វែងរកគំាទ្រដល់អភិវឌ្ឍន៍ធនធានមនុស្ស ពង្រឹង​សមត្ថភាព​មន្រ្តី​រាជ​ការ​អគ្គ​លេខាធិ​ការដ្ឋាន​រដ្ឋសភា ភ្ជាប់ទំនាក់ទំនងរដ្ឋសភាកម្ពុជា ជាមួយរដ្ឋសភាបរទេសនៅគ្រប់កម្រិត ទំាង​កម្រិត​ថ្នាក់​ដឹកនាំ គណៈកម្មការជំនាញ តំណាងរាស្រ្ត និងកម្រិតអគ្គលេខាធិកាដ្ឋានរដ្ឋភា ផងដែរ៕