បន្ទាយមានជ័យ​៖​ នៅព្រឹកថ្ងៃទី១១​ ខែមីនា​ ឆ្នាំ២០២៤​ បញ្ជាការដ្ឋានកងរាជអាវុធហត្ថ ខេត្តបន្ទាយមានជ័យ​ បើកវគ្គហ្វឹកហ្វឺន​ប្រចាំឆមាស១​ ឆ្នាំ២០២៤​ ជូនដល់សិក្ខាកាម​ កងកម្លាំង នៃកងរាជអាវុធហត្ថ​ ព្រមទាំងមានការចូលរួមពីកម្លាំងនគរបាល​ នៃស្នងការដ្ឋាននគរបាលខេត្ត​ សរុបចំនួន ១១៣​នាក់ ដែលមានរយៈពេល៤៥ថ្ងៃ​ (ចាប់ពីថ្ងៃទី១១ ខែមីនា ដល់ថ្ងៃទី០៣ ខែឧសភា ឆ្នាំ២០២៤)។

​នាឱកាសនោះ​លោកឧត្តមសេនីយ៍ត្រី​ បោន​ ប៊ិន​ មេបញ្ជាការកងរាជអាវុធហត្ថខេត្ត​ ក៏លើកឡើង​ថា​ ការងារហ្វឹកហ្វឺនរៀនសូត្រ គឺជាកិច្ចការចាំបាច់ ដែលត្រូវអនុវត្តជាប្រចាំដើម្បីពង្រឹង និងពង្រីក​នូវសមត្ថភាព នៃការយល់ដឹងដល់កងកម្លាំង​ ជាពិសេសយើងជាកម្លាំងអាវុធហត្ថ ជាកម្លាំង​នគរបាល ត្រូវមានកាយសម្បទារឹងមាំ មានចំណេះដឹងផ្នែកវិជ្ជាជីវៈ ។​

លោក​បន្តថា​ កងយោធពលខេមរភូមិន្ទ កងនគរបាលជាតិ ត្រូវជាគំរូក្នុងការអនុវត្តច្បាប់ និង​បទវិន័យទូទៅ របស់កងយោធពលខេមរភូមិន្ទ ក៏ដូចជាបទវិន័យទូទៅ របស់កងនគរបាលជាតិ។

លោកឧត្តមសេនីយ៍ត្រី​ បោន​ ប៊ិន​ បញ្ជាក់ថា​ បើទោះបីប្រទេសជាតិមានសន្តិភាព មានការ​អភិវឌ្ឍ និងរីកចំរើនក៏ដោយ​ កងយោធពលខេមរភូមិន្ទ កងនគរបាលជាតិ គឺជាកម្លាំងមួយត្រូវរួម​ចំណែក​ជាមួយរាជរដ្ឋាភិបាល ក្នុងការអភិវឌ្ឍប្រទេស។

បើតាមការបញ្ជាក់ឱ្យដឹងពីលោកអនុសេនីយ៍ឯក កែម ចាន់រស្មី នាយការិយាល័យផែនការ​ហ្វឹកហ្វឺន កងរាជអាវុធហត្ថខេត្ត បានបញ្ជាក់ថា​ វគ្គហ្វឹកហ្វឺននេះមានរយៈពេល ៤៥ថ្ងៃ​ (ចាប់ពី​ថ្ងៃទី១១ ខែមីនា ដល់ថ្ងៃទី០៣ ខែឧសភា ឆ្នាំ២០២៤)។ ដោយផ្តោតសំខាន់ចំនួន៦ មេរៀន រួមមាន​ ១-លំហាត់របៀបជួរទ័ព,​ ២-ប្រឆាំភេរវកម្ម វិធីសាស្រ្តបង្ក្រាបជនល្មើស,​ ៣-ការរក្សា​សណ្តាប់ធ្នាប់,​ ៤-ក្រមនីតិវិធីព្រហ្មទណ្ឌ,​ ៥-បាញ់គ្រាប់ពិត​ និងទី៦-ក្បាច់គុណបញ្ចស៊ីឡាត់៕​ អត្ថបទ​ រឿង​ ចន្ទ្រា