លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា ដែលទទួលបន្ទុកកិច្ចការនារី បាន​មាន​ប្រសាសន៍ថា តាមរយៈដំណើរ​ចូលរួម​កិច្ច​ប្រជុំ​កំពូល​សភាស្ត្រី​ នៅប្រទេសបារាំង​ដែល​សម្តេច​រដ្ឋសភាធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា អញ្ជើញ​ចូល​រួម​កាល​ពីថ្មី​ៗ​នេះ បានក្លាយជាបណ្ដាញស្រ្ដីដើម្បីដោះស្រាយបញ្ហាស្ត្រីលើសកលលោក។

ថ្លែងប្រាប់អ្នកសារព័ត៌មានបន្ទាប់ពីសម្តេចរដ្ឋសភាធិបតី ឃួន សុដារី ប្រធានរដ្ឋសភា បាន​ដឹក​នាំ​គណៈ​ប្រតិភូ​និវត្តន៍មកដល់មាតុប្រទេសវិញដោយសុវត្ថិភាព ក្រោយបញ្ចប់ទស្សនកិច្ច និងចូលរួម​កិច្ច​ប្រជុំ​កំពូលប្រធានសភាជាស្រ្តី នៅប្រទេសបារំាងប្រកបដោយភាពជោគជ័យ នៅថ្ងៃទី១១ ខែ​មីនា ឆ្នាំ២០២៤ លោកជំទាវ ឡោក ខេង បានឱ្យដឹងថា កិច្ចប្រជុំកំពូលសភាស្រ្តីលើកទី១នេះ បាន​ផ្តល់​នូវផ្លែផ្កាជាច្រើនដល់ការលើកកម្ពស់សិទ្ធិស្រ្តីលើសកលលោក និងការពិភាក្សា​ពី​បញ្ហា​ប្រឈម​ ក៏ដូចជារិះរកនូវមធ្យោបាយដោះស្រាយសមភាពយេនឌ័ររបស់ស្រ្តីគ្រប់រូបទងក្នុងតំបន់ និង​អន្តរជាតិ។

លោកជំទាវបញ្ជាក់ថា ដំណើរទស្សនកិច្ច និងការអញ្ជើញចូលរួមកិច្ចប្រជុំកំពូលសភាស្រ្តី កម្ពុជា​ទទួល​បាន​កិត្តិយស រួមទាំងបានតភ្ជាប់បណ្តាញស្រ្តីទាំងអស់ ដើម្បីផ្តល់​ព័ត៌មានគ្រប់​បញ្ហា​របស់​ស្រ្តី​ដែល​ជួប​ហានិភ័យ ក្នុងគោលបំណងបង្កើនការយល់ដឹង និងរៀបចំ​ជា​រចនា​សម័្ពន្ធ​រវាង​គ្នា​ទៅ​វិញ​ទៅមក​។

លោកជំទាសង្ឃឹមថា កិច្ចប្រជុំកំពូលសភាស្រ្តី​លើកនេះ​នឹង​រួម​ចំណែក​ដល់​កម្ពុជា​លើ​ការ​ជំរុញ​លើ​កិច្ច​សហប្រតិបត្តិការបណ្តុះបណ្តាញជំនាញ និងការអភិវឌ្ឍ​រដ្ឋសភា​កម្ពុជា​ឱ្យ​ទៅ​ជា​សភា​ឌីជីថល​ផង​ដែរ​។

លោកជំទាវ បញ្ជាក់ទៀតថា ក្នុងដំណើរទស្សនកិច្ចនេះសម្តេចរដ្ឋសភាធិបតី បាន​ប្រើ​ប្រាស់​នូវ​ទេពកោសល្យ បទពិសោធន៍ ការទូតសភាដ៏ទន់ភ្លន់ រស់រវើក ម៉ឹងម៉ាត់ ឈរលើ​គោលការណ៍​ឯករាជ្យ អធិបតេយ្យ ដើម្បីទាញយកផលប្រយោជន៍ជូនជាតិ និងប្រជាពលរដ្ឋ តាមរយៈ​វិស័យ​ការ​ទូតសភា រឹតចំណងមិត្តភាព កិច្ចសហប្រតិបត្តិការឱ្យកាន់តែសកម្មជាមួយសមភាគីបារំាង និង​សភា​បណ្តាប្រទេសនានា ដែលមានវត្តមាននៅក្នុងកិច្ចប្រជុំកំពូលប្រធានសភាជាស្រ្តីនេះ។

សូមជម្រាបថា កិច្ចប្រជុំកំពូលប្រធានសភាជាស្រ្តីកាលពីថ្មីៗនេះ មានវត្តមាន​ប្រធាន​សភា​ចំនួន ២៥​ប្រទេសចូលរួម ដែលនេះបានបង្ហាញជាមោទកភាពរបស់កម្ពុជា និងជាឱកាស​របស់​រដ្ឋសភា​កម្ពុជា ក្នុងការលើកកម្ពស់វិស័យការទូតសភាជាមួយសភាជាមិត្ត ក្នុងការជំរុញ​យន្តការ​សភា​នៅ​ក្នុង​ការ​ដោះស្រាយ និងស្វែងរកផលប្រយោជន៍ជូនពលរដ្ឋ ជាពិសេសស្រ្តី និងកុមារ៕ អត្ថបទ សេក ឧត្តម