ភ្នំពេញ៖ អគ្គនាយកដ្ឋានអន្តោប្រវេសន៍ បានឱ្យដឹងថា មន្ត្រីគយ និងរដ្ឋាករនៃការិយាល័យត្រួតពិនិត្យគយអាកាសយានដ្ឋានអន្តរជាតិភ្នំពេញ សហការជាមួយ​នគរបាលនៃមន្ទីរប្រឆាំងបទល្មើសគ្រឿងញៀន និងនគរបាលអន្តោប្រវេសន៍ បានត្រួតពិនិត្យ និងឃាត់ខ្លួនជនសង្ស័យជាជនជាតិចិនតៃវ៉ាន់ម្នាក់ និងដកហូតម្សៅសង្ស័យ​ជាសារធាតុញៀន ចំនួន៣៥ដុំ ខណៈដែលជនសង្ស័យត្រៀមឡើង​យន្តហោះ ចេញពីរាជធានីភ្នំពេញ។

នគរបាលអន្តោប្រវេសន៍ បានឱ្យដឹងថា ប្រតិបត្តិការត្រួតពិនិត្យនេះ បានធ្វើឡើងកាលពីថ្ងៃអាទិត្យ ទី១០ ខែមីនា ឆ្នាំ២០២៤ នៅស្ថានីយអ្នកដំណើរចេញនៃការិយាល័យ​ត្រួតពិនិត្យគយអាកាស​យានដ្ឋាន​អន្តរជាតិភ្នំពេញ ដោយមានការសម្របសម្រួលពីព្រះរាជអាជ្ញារងនៃអយ្យ​ការអមសាលា​ដំបូងរាជធានីភ្នំពេញ នាយកដ្ឋានច្រកទ្វារទី១ ​នៃអគ្គនាយកដ្ឋានអន្តោប្រវេសន៍ សហការជាមួយ​មន្ត្រីគយ និងរដ្ឋាករនៃការិយាល័យត្រួតពិនិត្យគយអាកាសយានដ្ឋាន​អន្តរជាតិភ្នំពេញ និង​នគរបាលនៃមន្ទីរប្រឆាំងបទល្មើសគ្រឿងញៀន ​ព្រមទាំងសមត្ថកិច្ចពាក់ព័ន្ធដែលប្រចាំការនៅ​អាកាសយានដ្ឋានអន្តរជាតិភ្នំពេញ បានធ្វើការត្រួតពិនិត្យលើអ្នកដំណើរម្នាក់​ ឈ្មោះ HUANG TENG YAO ភេទប្រុស អាយុ២៦ឆ្នាំ សញ្ជាតិ​ចិនតៃវ៉ាន់​ ធ្វើដំណើរតាមជើងយន្តហោះ ភ្នំពេញ-ហូជីមីញ រួចបន្តដំណើរពី ហូជីមីញ-តូក្យូ ។

ករណីនេះ មន្ត្រីគយ និងរដ្ឋាករនៃការិយាល័យត្រួតពិនិត្យគយអាកាសយានដ្ឋានអន្តរជាតិភ្នំពេញ បានអញ្ជើញ​សមត្ថកិច្ចចម្រុះចូលរួម ​ដើម្បីត្រួតពិនិត្យជាក់ស្តែង និងបានផ្អាកដំណើរជនសង្ស័យ​ដើម្បីបន្ត​កសាង​កំណត់ហេតុបន្តនីតិវិធីច្បាប់។

ក្រោយការត្រួតពិនិត្យជាក់ស្តែងលើដងខ្លួនរបស់ជនសង្ស័យរូបនេះ​ឃើញមានម្សៅក្រាមពណ៌ ស ច្រកក្នុងថង់រុំបង់ពណ៌ ស ដែលសង្ស័យជាសារធាតុញៀនចំនួន ​៣៥ដុំ និងបានធ្វើតេស្តម្សៅ​ក្រាមពណ៌ស ដោយប្រើម៉ាស៊ីនស្កែន TruNarc ជា​លទ្ធផលមានតម្រុយ​ជា​សារធាតុញៀន​ប្រភេទមេតំហ្វេតាមីន (METHAMPHETAMINE) ​ដែលស្ថិតនៅក្នុងតារាង II នៃច្បាប់ស្តីពីការត្រួត​ពិនិត្យគ្រឿងញៀន។

បច្ចុប្បន្នជនជាតិចិនតៃវ៉ាន់ឈ្មោះ HUANG TENG YAO ត្រូវបានសមត្ថកិច្ចកម្ពុជាសម្រេចឃាត់ខ្លួន ដើម្បីអនុវត្តតាមនីតិវិធី៕ អត្ថបទ៖ កុម្ភៈ