ខេត្តកោះកុង៖ មកដល់បច្ចុប្បន្ននេះ គម្រោងលើកកម្រិតគុណភាពផ្លូវជាតិលេខ៤៨ (ស្រែអំបិល-កោះកុង) កំពុងដំណើរការយ៉ាងរលូន ដោយសម្រេចបានលទ្ធផល ៤៥,១៧ភាគហើយ ខណៈ​ក្រោម​ការ​យកចិត្តទុកដាក់ពីឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បាន​ជំ​រុញឱ្យការស្ថាបនានេះត្រូវសម្រេចឱ្យបាន៦០ភាគរយ នាខែឧសភាខាងមុខ។ នេះ​បើ​តាម​ក្រសួង​សាធារណការ និងដឹកជញ្ជូន នៅថ្ងៃទី១១ ខែមីនា ឆ្នាំ២០២៤។

បើតាម ឯកឧត្ដម សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន បានឱ្យដឹងថា គម្រោង​លើកកម្រិតគុណភាពផ្លូវជាតិលេខ៤៨ ចាប់ពីចំណុចបំបែកផ្លូវជាតិលេខ៤ រហូតដល់​ក្រុង​ខេមរភូមិន្ទ ខេត្តកោះកុង មានប្រវែងសរុប ១៤៨គីឡូម៉ែត្រ គឺការដ្ឋាន​កំពុង​មមា​ញឹក​ខ្លាំង​លើ​ការងារ​អ៊ុត AC ជាបន្តបន្ទាប់។

ឆ្លើយតបទៅនឹងការជំរុញរបស់ឯកឧត្តមរដ្ឋមន្រ្តី ឯកឧត្តម សូរ វ៉ិចទ័រ បញ្ជាក់ថា នៅ​រដូវ​វស្សា​ឆ្នាំ​២០២៤​ខាង​មុខនេះ នឹងត្រូវធ្វើការងារ Base Course ឱ្យបានជាអតិបរមា និងការងារ Structure ដល់រដូវប្រាំង២០២៥ ដោយត្រូវអ៊ុត AC បញ្ចប់។ ឯកឧត្តម បញ្ជាក់ទៀតថា ទន្ទឹម​នឹង​វឌ្ឍន​ភាព​គម្រោងនេះក៏ជួបភាពយឺតយ៉ាវពេលកន្លងមកផងដែរ ដែលកត្តា​ទាំង​នោះ​បណ្តាល​មក​ពី​បញ្ហា​កូវីដ-១៩ និងដោយភូមិសាស្ត្រតំបន់នោះ នារដូវវស្សាមានភ្លៀងធ្លាក់ខ្លាំងរយៈពេល៦ខែ ក្នុង​មួយឆ្នាំ ដូច្នេះសល់ពេលតែ៦ខែសម្រាប់ការងារតែប៉ុណ្ណោះ។

សូមបញ្ជាក់ថា គម្រោងសាងសង់ផ្លូវជាតិលេខ៤៨ បានប្រារព្ធពិធីបើកការដ្ឋានកាលពីឆ្នាំ២០២២ ក្រោម​អធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន អតីតនាយករដ្ឋមន្ត្រី។ ផ្លូវប្រវែង ១៤៨ គីឡូម៉ែត្រនេះចាប់ផ្តើម នៅត្រង់បំបែកផ្លូវជាតិលេខ៤ ចំណុចបង្គោលគីឡូម៉ែត្រលេខ ១៤១+៧៥០ (ចំការហ្លួង) រហូតដល់ក្រុងខេមរភូមិន្ទ នៃខេត្តកោះកុង ជាប្រភេទផ្លូវបេតុងកៅស៊ូ (AC)​ កម្រាស់ ៧ស.ម និងជាប្រភេទបេតុងសរសៃដែក ត្រង់ផ្លូវប្រសព្វ ដែលមានកម្រាស់ ២៥ស.ម ដោយអនុវត្តក្រោមទំហំទឹកប្រាក់ប្រមាណជាង ៧៨លានដុល្លារ៕