ឯកអគ្គរដ្ឋទូតរុស្ស៊ី លោក អាណាថូលី អាន់ថូនៅ (Anatoly Antonov) បាននិយាយនៅថ្ងៃចន្ទ (១១ មីនា) នេះថាស្ថានទូតរុស្ស៊ី ក្នុងទីក្រុងវ៉ាស៊ីនតោន កំពុង «ទាក់ទងយ៉ាងជិតស្និទ្ធ» ជាមួយក្រសួងការបរទេសសហរដ្ឋអាមេរិក នៅមុនការបោះឆ្នោតជ្រើសរើសប្រធានាធិបតីនៅក្នុងប្រទេសរុស្ស៊ីក្នុងសប្តាហ៍នេះ ដើម្បីធានាសុវត្ថិភាពនៃបេសកកម្មការទូត។

ប្រធានាធិបតីរុស្ស៊ី លោក វ្ល៉ាឌីមៀ ពូទីន ដែលបានចាប់ផ្តើមការលុកលុយពេញលេញលើអ៊ុយក្រែនកាលពីពីរឆ្នាំមុន គ្រោងនឹងឈ្នះអាណត្តិថ្មីរយៈពេលប្រាំមួយឆ្នាំទៀតនៅក្នុងការបោះឆ្នោតថ្ងៃទី១៥ ដល់ទី១៧ ខែមីនា ខាងមុខនេះ។

លទ្ធភាពនៃជ័យជម្នះនេះអាចឱ្យលោក ពូទីន យកឈ្នះលើអតីតប្រមុខសហភាពសូវៀត លោក ចូសេហ្វ ស្តាលីន (Josef Stalin) ក្នុងការក្លាយជាមេដឹកនាំដែលកាន់អំណាចយូរបំផុតរបស់រុស្ស៊ី ក្នុងរយៈពេលជាង ២០០ ឆ្នាំមកនេះ។

លោក អាន់ថូនៅ ត្រូវបានដកស្រង់សម្តីដោយនិយាយនៅលើបណ្តាញផ្ញើសារតេឡេក្រាម របស់ស្ថានទូតថា៖ «ក្នុងលក្ខខណ្ឌនៃការបង្កហេតុជាប្រចាំ ស្ថានទូតកំពុងធ្វើការដោយស្ងប់ស្ងាត់ ហើយយើងកំពុងទាក់ទងយ៉ាងជិតស្និទ្ធជាមួយសេវាកម្មសម្ងាត់របស់ក្រសួងការបរទេសអាមេរិក។ យើងរំពឹងថាជនជាតិអាមេរិកនឹងបំពេញកាតព្វកិច្ចរបស់ពួកគេក្នុងការធានាសុវត្ថិភាពនៃបេសកកម្មការទូត»។

ឯកអគ្គរដ្ឋទូតរុស្ស៊ីរូបនេះមិនបានបញ្ជាក់ថាតើការបង្កហេតុអ្វីដែលលោកកំពុងសំដៅទៅលើនោះទេ ដោយគ្រាន់និយាយតែថា «កម្រិតនៃវោហាសាស្ត្រវាយប្រហាររុស្ស៊ី» របស់រដ្ឋបាលរបស់ប្រធានាធិបតីអាមេរិក លោក ចូ បៃដិន (Joe Biden) គឺហួសហេតុខ្លាំងណាស់៕