ព្យុះនិទាឃរដូវបាននាំមកនូវទឹកភ្លៀង និងខ្យល់បក់បោកយ៉ាងខ្លាំងទៅកាន់ឆ្នេរសមុទ្រភាគខាងកើតនៃសហរដ្ឋអាមេរិក កាលចុងសប្តាហ៍កន្លងមកនេះ។

បើយោងតាមសារព័ត៌មាន Portland Press Herald បានឲ្យដឹងថា នៅរដ្ឋ Maine ខ្យល់បក់ខ្លាំង និងដើមឈើរលំ បានធ្វើឲ្យមនុស្សរាប់ពាន់នាក់គ្មានថាមពលអគ្គិសនីប្រើប្រាស់ កាលថ្ងៃអាទិត្យ (ទី១០ ខែមីនា)។ បរិមាណទឹកភ្លៀងក្នុងតំបន់ប្រែប្រួលពី ១,៨អ៊ីង (៤,៥៧ សង់ទីម៉ែត្រ) ដល់ ២,៨អ៊ីញ (៧,១១សង់ទីម៉ែត្រ)។

ចំណែកទីក្រុង Charleston របស់រដ្ឋ South Carolina មានកម្រិតទឹកភ្លៀង ៣,៦៣អ៊ីង (៩,២២សង់ទីម៉ែត្រ)។ នេះបើយោងតាមសេវាកម្មអាកាសធាតុជាតិ ដែលបាននិយាយថា កម្រិតនោះបានបង្កើតនូវកំណត់ត្រាទឹកភ្លៀងថ្មី ក្នុងរយៈពេល ១ថ្ងៃ។

សារព័ត៌មាន Washington Post បានរាយការណ៍ថា ព្យុះនេះបានធ្វើដំណើរឆ្ពោះទៅភាគខាងជើងតាមបណ្តោយឆ្នេរសមុទ្រភាគខាងកើត និងរួមជាមួយនឹងការរំខានពីអាកាសធាតុផ្សេងទៀត នៅបឹង Great Lakes ដោយធ្វើឲ្យជន់លិចកាន់តែខ្លាំង និងការខូចខាតកាន់តែធ្ងន់ធ្ងរ៕