ខ្សែភាពយន្តបែបមនោសញ្ចេតនារបស់ជប៉ុន ដែលមានចំណងជើងថា «Evil Does Not Exist» បានឈ្នះពានរង្វាន់ភាពយន្តល្អបំផុតនៅក្នុងកម្មវិធី Asian Film Awards លើកទី១៧ កាលពីថ្ងៃអាទិត្យ (ទី១០ មីនា) ដោយធ្វើឲ្យអ្នកដឹកនាំរឿងម្ចាស់ពានរង្វាន់អូស្ការលោក Hamaguchi Ryusuke ឈ្នះពានរង្វាន់ភាពយន្តប្រភេទនេះ ២ដង ជាប់ៗគ្នា បន្ទាប់ពីជ័យជម្នះពីមុនរបស់លោក ជាមួយនឹងភាពយន្តរឿង «Drive My Car»។

នេះគឺជារាត្រីដ៏វិសេសវិសាលសម្រាប់ភាពយន្តរបស់ជប៉ុន ដោយលោក Hirokazu Kore-eda ទទួលបានពានរង្វាន់អ្នកដឹកនាំរឿងល្អបំផុត សម្រាប់ភាពយន្តរឿង «Monster»។ លោក Koji Yakusho ត្រូវបានផ្តល់កិត្តិយសជាតួសម្តែងល្អបំផុត ហើយភាពយន្ត «Godzilla Minus One» បែប 3D បានត្រឡប់ទៅផ្ទះវិញជាមួយនឹងពានរង្វាន់ចំនួន២ គឺ Best Visual Effects និង Best Sound។

ដោយតែងត្រូវបានដាក់ឈ្មោះថា ពានរង្វាន់ «Oscars» (អូស្ការ) ទ្វីបអាស៊ី តារាល្បីៗ មកពីទូទាំងតំបន់ ក្នុងនោះរួមទាំងវត្តមានតារាសម្តែងស្រីកូរ៉េខាងត្បូង Lee Young-ae និងតារាសម្តែងស្រីចិន Fan Bingbing បានដើរលើកម្រាលព្រំក្រហម នៅមជ្ឈមណ្ឌល Xiqu ក្នុងទីក្រុងហុងកុង មុនពេលពិធីចាប់ផ្តើម៕