កាលពីថ្ងៃអាទិត្យម្សិលមិញ ជនប៉ាឡេស្ទីនរាប់រយនាក់ បានជួបជុំគ្នានៅបរិវេនព្រះវិហារ Al-Aqsa ស្ថិតក្នុងទីក្រុងហ្សេរុយសាឡឹម មើលអឌ្ឍចន្ទដែលជាការចាប់ផ្តើមពិធីបុណ្យរ៉ាម៉ាដាន ។

ក្រុមអ្នកគោរពបូជាបានធ្វើពិធីកម្ម Tarawih នៅពេលល្ងាចផងដែរក្នុងព្រះវិហារ Al-Aqsa ដែលស្ថិតនៅក្នុងចំណោមទីតាំងដ៏ពិសិដ្ឋបំផុតរបស់សាសនាអ៊ីស្លាម និងជាព្រះវិហារដែលគេរំពឹងថា នឹងមានក្រុមអ្នកគោរពបូជារាប់ម៉ឺននាក់ជារៀងរាល់ថ្ងៃអំឡុងពិធីបុណ្យរ៉ាម៉ាដាន ។

គួរឲ្យដឹងថា ជនប៉ាឡេស្ទីនបានរៀបចំពិធីបុណ្យរ៉ាម៉ាដានទាំងទុក្ខព្រួយជាមួយនឹងវិធានការរឹតបន្តឹងសន្តិសុខកាន់តែខ្លាំងពីសំណាក់កងកម្លាំងនគរបាលអ៊ីស្រាអែល និងទិដ្ឋភាពនៃសង្គ្រាម និងភាពអត់ឃ្លាននៅក្នុងតំបន់ហ្កាហ្សា ដែលជាស្រមោលគ្របដណ្ដប់លើខែដ៏វិសុទ្ធរបស់មូស្លីមសាសនិក ខណៈការចរចាធានាឲ្យបានបទឈប់បាញ់បានជាប់គាំង ។ 

ក្រុមនគរបាលរាប់ពាន់នាក់ត្រូវបានដាក់ពង្រាយនៅជុំវិញផ្លូវតូចចង្អៀតនៃទីក្រុងចាស់ ជាទីដែលអ្នកគោរពបូជារាប់ម៉ឺននាក់ត្រូវបានរំពឹងថានឹងទៅកាន់ បរិវេណវិហារ Al-Aqsaជារៀងរាល់ថ្ងៃ ។ 

ព្រះវិហារដែលត្រូវបានចាត់ទុកថាជាកន្លែងពិសិដ្ឋបំផុតដោយជនជាតិជ្វីហ្វដែលស្គាល់វាថាជាព្រះវិហារ Temple Mount គឺជាតំបន់ជម្លោះដ៏យូរអង្វែង និងជាចំណុចចាប់ផ្តើមមួយនៃសង្រ្គាមចុងក្រោយកាលពីឆ្នាំ ២០២១រវាងអ៊ីស្រាអែល និងក្រុមហាម៉ាសោះ ៕