​ភ្នំពេញ៖ គ្រាប់បែកទម្លាក់ពីយន្តហោះចំនួន៣គ្រាប់ ត្រូវបានកម្លាំងស៊ីម៉ាក់ចុះទៅរំដោះដើម្បីបង្ការមិនឲ្យមានគ្រោះថ្នាក់ដល់មនុស្ស ខណះមានការអភិវឌ្ឍដីធ្លី ហើយជីកប៉ះចំ នៅ ៣ ទីតាំងផេ្សងគ្នា នៅស្រុកសំរោងទង ខេត្តកំពង់ស្ពឺ នៅស្រុកស្អាងនិង ស្រុកកណ្តាលស្ទឹង ខេត្ត កណ្តាល ។

យោងតាមការបញ្ជាក់ពីសំណាក់ឯកឧត្តម ហេង រតនា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកមជ្ឈ មណ្ឌលកំចាត់មីនកម្ពុជា(ស៊ីម៉ាក់)នៅក្នុងផេកហ្វេសបុករបស់ឯកឧត្តម នាថ្ងៃទី១១ខែមីនាឆ្នាំ២០២៤នេះឲ្យដឹងថា គ្រាប់បែកទម្លាក់ពីយន្តហោះចំនួន៣គ្រាប់ នេះរកឃើញ នៅ៣ទីតាំងផេ្សងពីគ្នា ស្ថិតនៅក្នុងស្រុកសំរោងទង ខេត្តកំពង់ស្ពឺ  ស្ថិតនៅស្រុកស្អាង និងស្រុកកណ្តាលស្ទឹង ខេត្តកណ្តាល   ក្នុងសប្តាហ៍ដេីមខែមីនា ឆ្នាំ២០២៤នេះដោយសារការអភិវឌ្ឍហើយជីកប៉ះចំគ្រាប់ទាំងនេះនៅក្នុងដីប្រឡាយ និងរណ្តៅដី ជាដេីម ។ ឯកឧត្តម ហេង រតនា បន្តថា ទាំង៣គ្រាប់នេះ សុទ្ធតែជាគ្រាប់បែកទម្លាក់ពីយន្តហោះប្រភេទ MK82 មានទម្ងន់ប្រមាណជាង ២៣០ គីឡូក្រាម ជាសំណល់សង្គ្រាម។ ឯកឧត្តមសម្តែងក្តីព្រួយបារម្ភថា ស្ថានភាពបែបនេះប្រថុយប្រថានណាស់ ប្រសិនជាមានករណីផ្ទុះវិញនោះ កុំថាឡេីយគ្រឿងចក្រ មនុស្ស ឬ សម្ភារ: ផ្ទះសម្បែងស្ថិតនៅក្បែរៗនោះ អាចខ្ទេចខ្ទីគ្មានសល់ឡេីយ៕ ដោយ៖ ភារម្យ