អំឡុងទស្សនកិច្ចផ្លូវការទៅកាន់ទីក្រុងម៉ានីលនាថ្ងៃចន្ទនេះ រដ្ឋមន្រ្តីក្រសួងពាណិជ្ជកម្មសហរដ្ឋអាមេរិកលោកស្រី Gina Raimondo និយាយថា ក្រុមហ៊ុនសហរដ្ឋអាមេរិកនឹងប្រកាសការវិនិយោគទុនជាង ១ពាន់លានដុល្លារនៅប្រទេសហ្វីលីពីន ។

លោកស្រីនិយាយថា ការវិនិយោគទុននេះ នឹងលើវិស័យជាច្រើនដូចជាវិស័យថាមពលពន្លឺព្រះអាទិត្យ រថយន្តអគ្គិសនី និងវិស័យឌីជីថល ហើយក្រុមហ៊ុនសហរដ្ឋអាមេរិក ចង់ធ្វើមុខជំនួញនៅក្នុងប្រទេសអាស៊ីអាគ្នេយ៍មួយនេះ ។

លោកស្រី Raimondo ស្ថិតក្នុងដំណើរទស្សនកិច្ចពាណិជ្ជកម្មរយៈពេល ២ថ្ងៃនៅទីក្រុងម៉ានីល និងស្ថិតក្នុងបេសកកម្មវិនិយោគទុនតាងនាមឲ្យលោកប្រធានាធិបតី Joe Biden ។

គណៈប្រតិភូរបស់លោកស្រី រួមមានទាំងក្រុមមន្រ្តីកំពូលៗមកពីក្រុមហ៊ុនជាច្រើនដូចជាក្រុមហ៊ុន GreenFire Energy, Inc., Google Asia Pacific, Visa, United Airlines និងក្រុមហ៊ុន KKR ។

គួរឲ្យដឹងថា ហ្វីលីពីន និងសហរដ្ឋអាមេរិក គឺជាសម្ព័ន្ធមិត្តយូរអង្វែងនឹងគ្នា តាមរយៈសន្ធិសញ្ញាការពារជាតិរយៈពេល ៧៣ឆ្នាំ ។

ដោយឡែក ប្រធានាធិបតីហ្វីលីពីនលោក Ferdinand Marcos បានព្យាយាមពង្រឹងទំនាក់ទំនងជិតស្និតជាងមុនជាមួយសហរដ្ឋអាមេរិក ចាប់ពីកិច្ចសហប្រតិបត្តិការការពារជាតិ រហូតភាពជាដៃគូសេដ្ឋកិច្ច ៕