នៅថ្ងៃចន្ទនេះ វិមានក្រឹមឡាំងបដិសេធន៍មិនធ្វើសេចក្តីអត្ថាធិប្បាយលើសេចក្តីរាយការណ៍របស់ទូរទស្សន៍ CNNថា សហរដ្ឋអាមេរិកត្រៀមខ្លួនរួចរាល់កាលពីចុងឆ្នាំ ២០២២ សម្រាប់ការវាយប្រហារនុយក្លេអ៊ែរណាមួយរបស់រុស្ស៊ីនៅអ៊ុយក្រែន ។

CNN បានរាយការណ៍កាលពីថ្ងៃសៅរ៍ថា រដ្ឋបាលរបស់ប្រធានាធិបតីសហរដ្ឋអាមេរិកលោក Joe Biden មានការព្រួយបារម្ភជាពិសេសថា រុស្ស៊ីនឹងប្រើប្រាស់អាវុធតាក់ទិក ឬអាវុធនុយក្លែអ៊ែរនៅអ៊ុយក្រែន ។

CNN រាយការណ៍បន្តថា ទីភ្នាក់ងារចារកម្មសហរដ្ឋអាមេរិក ទទួលបានព័ត៌មានថា មាននូវការទំនាក់ទំនងនៅក្នុងចំណោមក្រុមមន្រ្តីរុស្ស៊ី បានពិភាក្សាលើការវាយប្រហារដោយអាវុធនុយក្លេអ៊ែរនៅឆ្នាំ ២០២២ ។

លោក Dmitry Peskov គឺជាអ្នកនាំពាក្យវិមានក្រឹមឡាំង និយាយប្រាប់ក្រុមអ្នកសារព័ត៌មានថា នេះគ្រាន់តែជាការព្យាករណ៍ប៉ុណ្ណោះដែលតែងតែចុះផ្សាយនៅលើទំព័រកាសែតជាច្រើន ។ 

លោកបន្តថា លោកគិតថា វាមិនសមនោះទេ ក្នុងការផ្តល់សេចក្តីអត្ថាធិប្បាយណាមួយលើករណីមួយនេះ ។

ខណៈពេលនោះដែរ ប្រជាជនរុស្សី កំពុងមានអារម្មណ៍ថា មានការប៉ះពាល់យ៉ាងខ្លាំងពីការវាយប្រហាររបស់អ៊ុយក្រែនលើហេដ្ឋារចនាសម្ព័ន្ធប្រេង នៅក្នុងស្ថានភាពមួយដែលពួកគេពិបាកក្នុងការគ្រប់គ្រង ខណៈដែលឃ្លាំងប្រេងមួយ នៅក្នុងតំបន់ Kursk បានក្លាយជាទីតាំងចុងក្រោយបំផុតដែលត្រូវបានកំណត់គោលដៅ។

ដោយឡែក ម្ចាស់ឃ្លាំង Ukrlandfarming របស់អ៊ុយក្រែន បាននិយាយកាលពីយប់ថ្ងៃអាទិត្យថា ឃ្លាំងស្តុកគ្រាប់ធញ្ញជាតិដ៏ធំមួយ ត្រូវបានបំផ្លាញទាំងស្រុង នៅក្នុងការវាយប្រហារដោយមីស៊ីលរបស់រុស្ស៊ីទៅលើតំបន់ Dnipro ភាគខាងកើតអ៊ុយក្រែនកាលពីចុងសប្តាហ៍នេះ និងបានធ្វើបង្កឲ្យមនុស្សម្នាក់ រងរបួស ។ ឃ្លាំងUkrlandfarming គឺជាឃ្លាំងស្តុកគ្រាប់ធញ្ញជាតិធំបំផុតមួយរបស់អ៊ុយក្រែន ដែលជាលទ្ធផលនៃការឈ្លានពានរបស់រុស្ស៊ី ក្នុងឆ្នាំ ២០២២ បានទទួលរងការខាតបង់ប្រហែលមួយពាន់លានដុល្លារ គិតត្រឹមចុងឆ្នាំ ២០២៣ ៕