ក្រុមអាជ្ញាធរនិយាយនៅថ្ងៃចន្ទនេះថា ទឹកជំនន់ និងបំណាក់ដីនៅខេត្តស៊ូម៉ាត្រាខាងលិច ប្រទេសឥណ្ឌូនេស៊ី បានសម្លាប់មនុស្សយ៉ាងហោច ២៦នាក់ ក្នុងនោះមនុស្ស ៦នាក់ផ្សេងទៀត កំពុងបាត់ខ្លួន ។

រយៈពេលជាច្រើនថ្ងៃក្រោយភ្លៀងធ្លាក់ខ្លាំង ផ្ទះជាច្រើនខ្នង និងហាងលក់ទំនិញជាច្រើនកន្លែង បានរងការខូចខាតដោយសារការជន់លិច ហើយផ្លូវបានបាក់ស្រុតចូលទន្លេ ហើយផ្លូវជាច្រើនខ្សែ បានបិទដោយសារដើមឈើបាក់ ។

ប្រធានទីភ្នាក់ងារកាត់បន្ថយគ្រោះមហន្តរាយឥណ្ឌូនេស៊ី បានធ្វើដំណើរទៅដល់ទីក្រុង Padang នាថ្ងៃចន្ទនេះ ដើម្បីដឹកនាំកិច្ចខិតខំសម្របសម្រួល និងវាយតម្លៃផលខូចខាត ហើយនិងចែកមូលនិធិសង្រ្គោះបន្ទាន់ ។

ទីភ្នាក់ងារមួយនេះ និយាយនៅក្នុងសេចក្តីថ្លែងការណ៍ថា ប្រជាពលរដ្ឋយ៉ាងហោច ៣៩.០០០នាក់ បានរងផលប៉ះពាល់ដោយសារបំណាក់ដី និងទឹកជំនន់នៅក្នុងតំបន់ ៕