គិតក្នុងថ្ងៃទី១ នៃកម្មវិធីពិព័រណ៍រដ្ឋាភិបាលឌីជីថល និងបច្ចេកវិទ្យាឌីជីថលកម្ពុជា-អន្តរជាតិ នៃ​វេទិការដ្ឋាភិបាលឌីជីថល បានកត់សម្គាល់ឃើញថា មានសិស្ស និស្សិត និងយុវជនជាច្រើននាក់ បាន​ចូលរួមទស្សនា និងស្វែងយល់​អំពី​បច្ចេកវិទ្យាថ្មី​ជា​មួយនឹង​ការ​សាកល្បង​ផ្ទាល់​នូវ​ឧបករណ៍​បច្ចេក​វិទ្យា​ឌីជីថលផងដែរ។

លោក ម៉េង ចន្ថា និស្សិតមកពីសាកលវិទ្យាល័យ ក្នុងបទសម្ភាសន៍ជាមួយទូរទស្សន៍ព័ត៌មាន ប៊ីធីវី បាន​លើកឡើងថា កម្មវិធីនេះពិតជាមានសារៈសំខាន់ណាស់ ថែមទាំងផ្តល់​នូវ​អត្ថ​ប្រយោជន៍​ជា​ច្រើន​សម្បូរ​បែប ដូចជាទទួលបានព័ត៌មាន និងឱកាសល្អៗជាច្រើន និងការទស្សនា​ស្តង់​ពិព័រណ៍​ផលិត​ផល និង​សេវាកម្មឌីជីថលថ្មីៗរបស់ក្រសួង ស្ថាប័ន និងក្រុមហ៊ុនបច្ចេក​វិទ្យា​ឌីជីថល​ល្បី​ទាំង​ជាតិ និងអន្តរជាតិជាដើម។

ក្រុមនិសិ្សតដែលកំពុងរៀនជំនាញផ្នែកឌីជីថល បាននិយាយថា ពិព័រណ៍​នេះ បានធ្វើ​ឲ្យ​ពួក​គេ​បាន​ឈ្វេង​យល់អំពីរដ្ឋាភិបាលឌីជីថល និងការវិវត្តថ្មីៗនៃបច្ចេកវិទ្យាឌីជីថល ជាពិសេសការ​ទទួល​បាន​នូវ​បទ​ពិសោធថ្មីៗ ដែលពុំធ្លាប់ឃើញពីមុនមកនោះទេ។ ក្រុមនិស្សិតទាំងនេះ បាន​ទទួល​ស្គាល់​ទៀត​ថា ការរៀនជំនាញបច្ចេកវិទ្យាឌីជីថល នឹងធ្វើឲ្យពួកគាត់បានស្គាល់ និងដឹង​អំពី​ការ​វិវឌ្ឍ​ថ្មីៗ នៃពិភពលោកផងដែរ។

ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ បានមានប្រសាសន៍ថា ពិព័រណ៍​​រដ្ឋាភិបាលឌីជីថល និងបច្ចេកវិទ្យាឌីជីថលកម្ពុជា-អន្តរជាតិ រៀបចំឡើង ដើម្បីបង្ហាញ​អំពី​សមិទ្ធផលនៃការកសាងរដ្ឋាភិបាលឌីជីថល ការអភិវឌ្ឍថ្នាលបច្ចេកវិទ្យា គុណ​ប្រយោជន៍​ការ​ប្រើប្រាស់​ថ្នាល​បច្ចេកវិទ្យា ការផ្តល់សេវាសាធារណៈរបស់ក្រសួង ស្ថាប័នរដ្ឋសរុបចំនួន ១១៨ និង​ស្តង់​ចំនួន១៥០ ដោយប្រើប្រាស់ថ្នាលបច្ចេកវិទ្យាឌីជីថល ដែលអភិវឌ្ឍដោយក្រសួង ស្ថាប័ន​របស់​រដ្ឋាភិបាល សេវាកម្មទូរសព្ទនិងអ៊ីនធឺណិត សេវាប្រៃសណីយ៍ សេវាហ្វិនតិច និងសេវា​ធុរកិច្ច​ថ្មី​ឌីជីថល​ជាដើម។

សូមបញ្ជាក់ថា កម្មវិធីពិព័រណ៍រដ្ឋាភិបាលឌីជីថល និងបច្ចេកវិទ្យាឌីជីថលកម្ពុជា-អន្តរជាតិ មាន​រយៈ​ពេល ៣ថ្ងៃ គិតចាប់ពីថ្ងៃទី១១ ដល់១៣ ខែមីនា ឆ្នាំ២០២៤ ដែលរៀបចំ​ឡើង​នៅ​អគារ​កោះ​ពេជ្រ ចាប់ពីម៉ោង ៧ព្រឹក ដល់ម៉ោង៦ល្ងាច។ កម្មវិធីពិព័រណ៍នេះ រៀបចំ​ឡើង​ក្នុង​គោល​បំណង​បង្ហាញ​អំពី​សមិទ្ធផលនៃការកសាងរដ្ឋាភិបាលឌីជីថល ស្របតាមក្រប​ខណ្ឌ​គោល​នយោបាយ​សេដ្ឋកិច្ច និងសង្គមឌីជីថលកម្ពុជា២០២១-២០៣៥ និងគោល​នយោបាយ​រដ្ឋាភិបាល​ឌីជីថល​កម្ពុជា​២០២២-២០៣៥ ជាពិសេសបញ្ចកោណទី៥ នៃយុទ្ធសាស្ត្របញ្ចកោណដំណាក់កាលទី១ របស់​រាជរដ្ឋាភិបាលកម្ពុជា ព្រមទាំងមានការរៀបចំកិច្ចពិភាក្សា និង​ការចែក​រំលែក​អំពី​ប្រធាន​បទ​សំខាន់ៗ​ពីវាគ្មិនជាតិ និង​អន្តរជាតិពាក់ព័ន្ធនឹងទិដ្ឋភាពគោលនយោបាយ និន្នាការ​នៃការ​រីក​ចម្រើន របស់បច្ចេកវិទ្យាឌីជីថល ការផ្លាស់ប្ដូរ​បទ​ពិសោធ និង​ឧត្តមានុវត្តន៍​ នៃ​ការ​ជំរុញ​ល្បឿន​បរិវត្ត​កម្ម​ឌីជីថល និងការប្រើប្រាស់បច្ចេកវិទ្យាថ្មីៗ៕ អត្ថបទ៖ ឈិត បូរ៉ាវី