ភ្នំពេញ៖ ជនបរទេសចំនួន១៦៧នាក់ត្រូវបណ្តេញចេញពីកម្ពុជា ក្រោយសមត្ថកិច្ចរកឃើញស្នាក់នៅខុសច្បាប់ ខណៈក្នុងចំណោមនោះមានជនជាតិវៀតណាមបានបណ្តេញរួចរាល់ពីកម្ពុជា។ នេះបើតាមមន្រ្តីជាន់ខ្ពស់នៃអគ្គនាយកដ្ឋានអន្តោប្រវេសន៍។
បើតាមលោកឧត្តមសេនីយ៍ឯក អ៊ុក ហៃសិលា អគ្គនាយករងនៃអគ្គនាយកដ្ឋានអន្តោប្រវេសន៍ បានឱ្យនៅថ្ងៃទី១១ ខែមីនា ឆ្នាំ២០២៤ថា អនុវត្តតាមបទបញ្ជារបស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងក្រោមការចង្អុលបង្ហាញរបស់ឯកឧត្តមសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ កន្លងអគ្គនាយកដ្ឋានអន្តោប្រវេសន៍ សហការជាមួយគណៈបញ្ជាការឯកភាពរដ្ឋបាលខេត្តព្រះសីហនុ ដែលមានស្នងការដ្ឋាននគរបាលខេត្តព្រះសីហនុ បានធ្វើការចុះប្រតិបត្តិការបង្រ្កាបល្បែងស៊ីសងខុសច្បាប់ នៅចំណុចអតីតកាស៊ីណូ PARADISE ISLAND ស្ថិតនៅសង្កាត់លេខ៤ ក្រុងព្រះសីហនុ កាលពីថ្មីៗនេះ ដោយរកឃើញជនបរទេសចំនួនជាង១០០នាក់ ស្មើនឹង៤សញ្ជាតិ។
លោកឧត្តមសេនីយ៍ឯក បញ្ជាក់ថា ជនបរទេសចំនួន១៦៧នាក់ ដែលបានឃាត់ខ្លួននោះ មាន ៤សញ្ជាតិ រួមមាន ជនជាតិវៀតណាម ចំនួន១០៩នាក់, ជនជាតិថៃ ចំនួន ៥៤នាក់ និងជនជាតិចិនតៃវ៉ាន់ ចំនួន៤នាក់។ លោកឧត្តមសេនីយ៍ឯក បន្តថា ក្នុងចំណោមនោះ អគ្គនាយកដ្ឋានអន្តោប្រវេសន៍បានស្នើ និងទទួលការឯកភាពពីក្រសួងមហាផ្ទៃ ដើម្បីធ្វើការបណ្តេញចេញពីកម្ពុជា មានជនជាតិវៀតណាមចំនួន ១០៩នាក់ ត្រូវបញ្ជូនត្រឡប់ទៅប្រទេសរបស់ខ្លួនវិញ នៅថ្ងៃទី១១ ខែមីនា ម្សិលមិញនេះតាមច្រកព្រំដែនអន្តរជាតិព្រែកចាក ខេត្តកំពត ខណៈជនបរទេសផ្សេងទៀតនឹងបញ្ជូនចេញពីកម្ពុជានាប៉ុន្មានថ្ងៃខាងមុខ។
លោកឧត្តមសេនីយ៍ឯក បញ្ជាក់ថា ក្រោយសាកសួរ និងស្រាវជ្រាវយ៉ាងម៉ត់ចត់ កម្លាំងជំនាញបានសម្រេចកសាងសំណុំរឿងចំពោះជនសង្ស័យពាក់ព័ន្ធនឹងបទល្បែងស៊ីសងខុសច្បាប់ចំនួន៥នាក់ ជាជនជាតិចិន ទៅកាន់សាលាដំបូងខេត្តព្រះសីហនុ ដើម្បីបន្តចាត់វិធានការទៅតាមផ្លូវច្បាប់។
សូមជម្រាបថា ក្រោយប្រតិបត្តិការមួយថ្ងៃរកឃើញជនបរទេសជាង១០០នាក់ នៅថ្ងៃទី១០ ខែមីនា ឆ្នាំ២០២៤ ឯកឧត្តមសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ បានដឹកនាំកម្លាំងដោយផ្ទាល់សហការជាមួយគណៈបញ្ជាការឯកភាពរដ្ឋបាលខេត្តព្រះសីហនុ ដែលមានស្នងការដ្ឋាននគរបាលខេត្តព្រះសីហនុ ដោយបានចុះប្រតិបត្តិការជាលើកទីពីរ នៅទីតាំងផ្សេងគ្នា សង្ស័យមានបទល្មើសល្បែងស៊ីសងខុសច្បាប់ ក្នុងក្រុងព្រះសីហនុ រកឃើញជនជាតិខ្មែរចំនួនជាង ២០០នាក់ និងជនបរទេសចំនួន៣០នាក់ មានចិន និងមីយ៉ាន់ម៉ា និងត្រូវបានសមត្ថកិច្ចជំនាញបន្តនីតិវិធីទៅតាមច្បាប់៕