​ស្នូកឃ័រ៖ កីឡាការិនី​ស្នូកឃ័រ​ជម្រើសជាតិ​កម្ពុជា ស្រួ​ង ភា​វី បាន​បន្ដ​ចូលរួម​ការប្រកួត​ព្រឹត្តិការណ៍​ដ៏​ធំថ្មី​មួយទៀតនៅ​សាធារណរដ្ឋ​កូរ៉េ គឺ​ការប្រកួត​កីឡា​ស្នូកឃ័រ​កា​រ៉ុ​ម​ជ្រើសរើស​ជើងឯក PBA Team League រដូវ​កាល​ឆ្នាំ​២០២១-២០២២ ដែលមាន​ប្រាក់រង្វាន់​សរុប ១០​ម៉ឺន​ដុល្លារ។​

​លោ​ស្រី ស្រួ​ង ភា​វី បាន​បញ្ជាក់​ថា ព្រឹត្តិការណ៍​នេះ​ស្រដៀង​នឹង​ការប្រកួត​កម្រិត​ពិភពលោក Blue One Resort LPBA Championship ដែល​លោកស្រី​ទើប​ដណ្ដើមបាន​ជើងឯក​ផ្នែក​នារី កាលពីពេល​ថ្មីៗ​កន្លងទៅ​ដែរ ប៉ុន្ដែ​កម្មវិធី​នេះគឺ​ប្រកួត​ជា​ក្រុម មិនមែន​ប្រកួត​ឯក​ត្ដ​ជន​ដូច​ការប្រកួតកាលពី​ខែ​មុន​ឡើយ។​ ​ការប្រកួត​នេះគ្រោង​ធ្វើ ១​ខែ​ពេញក្នុង​ខែកក្កដា​នេះ បន្ទាប់ពី​ចាប់ផ្ដើម​ការប្រកួតកាលពីដើម​សប្ដាហ៍​មុន ដោយមាន​ក្រុម​ខ្លាំងៗតំណាង​ឲ្យ​ក្រុមហ៊ុន​ធំៗ​ចំនួន ៨ ចូលរួម ក្នុងនោះ​លោកស្រី និង​មិត្ត​រួម​ក្រុម ៥​រូប​ទៀតដែលមាន​ជនជាតិ​កូរ៉េ ៤​រូប និង​ជនជាតិ​អេ​ស្ប៉ា​ញ ១​រូបបាន​ចាប់ដៃគ្នា​ប្រកួត​តំណាង​ក្រុមហ៊ុន Blue One Resort។​

​កីឡាការិនី​មាន​ប្រភពពី​ខេត្ត​ត្បូងឃ្មុំ​ដដែល​បន្ដថា ការប្រកួត​នេះ​មាន​លក្ខណៈ​ស្វិតស្វាញ​ខ្លាំង ដ្បិត​ត្រូវធ្វើ​ការប្រកួត​សន្សំ​ពិន្ទុ​គ្រប់ៗ​គ្នា ដើម្បី​ចម្រាញ់​រក​ក្រុម​ខ្លាំង​ឡើង​វគ្គ​បន្ដ ហើយ​ឈានទៅ​ដណ្ដើម​ជើងឯកដែលមាន​ប្រាក់រង្វាន់​ចំនួន ១០​ម៉ឺន​ដុល្លារ។ ភា​វី បាន​ប្ដេជ្ញា​នឹង​ខិតខំ​ប្រឹង​បន្ថែមទៀតដើម្បី​ដណ្ដើម​លទ្ធផល​ល្អ ពិសេស​នាំមក​នូវ​កិត្តិយស​ជូន​ប្រទេស​កំណើត​របស់ខ្លួន ។​ ​គួរ​បញ្ជាក់ថា កាលពី​ចុងខែ​មិថុនា​កន្លងទៅ ស្រួ​ង ភា​វី ទើប​បើក​កំណត់ត្រា​ថ្មី​ក្នុង​អាជីព​កីឡា​ស្នូកឃ័រ​អាជីព ឬ​ស្នូកឃ័រ​កា​រ៉ុ​ម​របស់ខ្លួន បន្ទាប់ពី​ដណ្ដើមបាន​ជើងឯក​ពាន​កម្រិត​ពិភពលោក Blue One Resort LPBA Championship 2021 អម​ជាមួយ​ប្រាក់រង្វាន់​ជិត ១៨,០០០​ដុល្លារ ក្រោយ​យកឈ្នះម្ចាស់ផ្ទះ​កូរ៉េ Kim Gayoung ក្នុង​វគ្គ​ផ្ដាច់ព្រ័ត្រដោយ​លទ្ធផល ៣-១​សិត ៕

​អត្ថបទ៖ លី ឈុន​ឡា